2,5 млн доллар йиғган америкалик аёл 28 ёшида нафақага чиқди

Етти йил ишлаган 28 ёшли америкалик аёл нафақага чиқиши учун зарур пул миқдорини йиғиб олди, деб хабар беради Forum Daily.

У Жей Пи Ливингстон тахаллусидан фойдаланиб, The Money Habit блогини юритади. Аёл мазкур блогда ёш пайтиданоқ молиявий бошқарувни ўргангани ҳақида ҳикоя қилади.

Аёл 12 ёшида «Бадавлат ота, қашшоқ ота» китобини ўқиб, молия ва инвестицияларга қизиқиб қолган.

Ливингстон етти йил давомида даромадларининг 70 фоиздан кўпроғини йиғиб, 2,25 миллион долларга эга бўлди. У даромадининг 40 фоизини омадли инвестициялар, 60 фоизини тежамкорлик асосида тўплади.

Аёл мазкур маблағ 28 ёшида нафақага чиқиш учун етарли, деган қарорга келди.  Ливингстон пулни тежаш учун бир нечта психологик трюклардан фойдаланган.

«Бирон нарса харид қилмоқчи бўлсангиз, уни пул бирлиги билан эмас, балки вақтингиз билан ўлчанг. Масалан, iPhone 800 доллар туради, дейиш ўрнига, у сизнинг 60 соат иш вақтингизга ёки ҳаётингизнинг бир ярим ҳафтасига тўғри келишини ўйланг», — дейди аёл.

Бу ҳолат эса мазкур харид сарфлаган вақтингизга арзийдими, деб ўйлашингизга сабаб бўлади.

Ливингстон пулни тежаш учун инсон ўзининг энг катта харажатларини аниқлаб олиши ва уларни қисқартириши кераклигини тавсия этади.

Шунингдек, у даромадларингиз миқдори кўпайган бўлса-да, ҳашаматли ҳаёт тарзини бошламасликни маслаҳат беради. Яхшиси, шу пайтга қадар бўлган харажатлар даражасини сақлаб қолган маъқул.