Тошкент шаҳрида Баҳодир Исроилов, Фурқат Азизлархўжаев, Дилшод Қиличев ва Шаҳбоз Иcҳақов ўзаро тил бириктириб, 50 минг сўмлик купюраларни қалбакилаштириш билан шуғулланиб келгани аниқланди. Бу ҳақда ИИББ матбуот хизмати маълум қилди.
Улар жами 100 дона шундай қалбаки пул тайёрлаган ва бундан 3,6 миллион сўмини эҳтиёжи учун сарфлашга ҳам улгурган.
7 февраль куни Тошкент шаҳар ИИББ ходимлари томонидан ўтказилган тадбир жараёнида мазкур гуруҳ Яшнобод тумани жойлашган дўконда маҳсулот харид қилмоқчи бўлгани аниқланиб, ушланди ва улардан 1,4 миллион сўм миқдоридаги қалбаки пул ашёвий далил сифатида расмийлаштириб олинди.
Мазкур ҳолат юзасидан Яшнобод тумани ИИБ ҳузуридаги тергов бўлими томонидан ЖКнинг 176-моддаси 2-қисми «в» банди (бир гуруҳ шахслар томонидан олдиндан тил бириктириб, ўтказиш мақсадида қалбаки қимматли қоғозлар ясаш ва уларни ўтказиш) аломатлари билан жиноят иш қўзғатилди.
Ҳозирда дастлабки тергов ҳаракатлари давом эттирилиб, уларнинг бошқа жиноятларга алоқадорликлари текширилмоқда.
Изоҳ (0)