Миллий матбуот марказида «Ўзтрансгаз» акциядорлик жамияти томонидан аҳолига мунтазам ва узлуксиз газ маҳсулотларини етказиб бериш борасида амалга оширилаётган чора-тадбирлар ҳақида журналистларга маълумот берилди. Бу ҳақда ЎзА хабар бермоқда.
«Ўзтрансгаз» АЖ бошқарма бошлиғи Акмал Эшонқуловнинг таъкидлашича, бугунги кунда 6 миллион 143 минг истеъмолчига газ ёқилғиси етказиб берилмоқда. Улардан 2 миллион 760 минг аҳоли хонадонлари суюлтирилган газдан фойдаланади.
Жорий йилнинг ўтган даврида 105 километрдан зиёд газ қувурлари таъмирланди, 239,7 километр узунликдаги газ қувурлари реконструкция қилинди, 7 минг километрга яқин қувур босим остида синаб кўрилди.
Ўтган йил аҳолига 750 минг дона маиший газ баллонлар етказиб берилди. Жорий йилда яна 590 минг дона шундай баллонлар етказиб бериш режалаштирилган. Мутахассислар фикрича, бугунги кунда маиший газ баллонлар умумий сони 3,7 миллионга етиб, 2017 йилда 366,2 минг тонна суюлтирилган газ аҳолига етказиб берилган. Бу аҳолининг газ ёқилғисига бўлган эҳтиёжини қоплайди.
— Вазирлар Маҳкамаси қарорига биноан 2018 йил 1 апрелдан аҳолига сотиладиган 1 атм суюлтирилган газ нархи Қорақалпоғистон Республикаси ва Хоразм вилоятида 720 сўм, Фарғона водийси вилоятлари ва Тошкент вилоятида 700 сўм, қолган ҳудудларда 500 сўм этиб белгиланади. 2018 йил 1 августдан эса мамлакатнинг барча ҳудудларида суюлтирилган газнинг ягона чакана нархи жорий этилади. Хусусан, аҳолига 1 килограмм суюлтирилган газ 800 сўмдан етказиб берилади, — деди А.Эшонқулов.
Изоҳ (0)