ИШИД террорчилик гуруҳи жанг майдонларида мағлубиятга учраб, молиялаштириш манбаларининг 90 фоизидан айрилди, аммо ҳамон жиддий хавф туғдиради ва «Ал-Қоида» билан бирлашиши мумкин. Бу ҳақда БМТ бош котиби Антониу Гутерришнинг маърузасида айтилади, деб ёзади «ТАСС».
Ташкилот маъмурий раҳбари мамлакатларни террорчилик билан курашда огоҳликни сақлашга чақириб, баъзи ҳудудларда ИШИД ва «Ал-Қоида» тармоғи қўшилиши салоҳияти мавжудлиги ҳақида огоҳлантирди.
У сўнгги олти ой давомида гуруҳ Ироқ, Сурия ҳамда Филиппин жанубида стратегик мағлубиятга учраганини, натижада шаҳар туманларидаги таянч пунктларини қолдириб, ўзгарган муҳитга мослашишга мажбур бўлганини айтди.
Гутерриш ИШИД «истило ва ҳудудларни сақлаб қолиш йўналиши»дан воз кечиб, «ҳамон ташқи терактларга эътибор қаратаётган»лигини тахмин қилди.
«БМТга аъзо мамлакатлар ИШИД ва ‘Ал-Қоида’ тармоқларининг баъзи аъзолари бир-бирининг операцияларини қўллаб-қувватлашга шайлиги ҳамон хавотир уйғотишини, икки тармоқнинг қўшилиш эҳтимоли эса янги таҳдидни келтириб чиқаришини қайд этди», — дейилади маърузада.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)