IShID terrorchilik guruhi jang maydonlarida mag‘lubiyatga uchrab, moliyalashtirish manbalarining 90 foizidan ayrildi, ammo hamon jiddiy xavf tug‘diradi va “Al-Qoida” bilan birlashishi mumkin. Bu haqda BMT bosh kotibi Antoniu Guterrishning ma’ruzasida aytiladi, deb yozadi “TASS”.
Tashkilot ma’muriy rahbari mamlakatlarni terrorchilik bilan kurashda ogohlikni saqlashga chaqirib, ba’zi hududlarda IShID va “Al-Qoida” tarmog‘i qo‘shilishi salohiyati mavjudligi haqida ogohlantirdi.
U so‘nggi olti oy davomida guruh Iroq, Suriya hamda Filippin janubida strategik mag‘lubiyatga uchraganini, natijada shahar tumanlaridagi tayanch punktlarini qoldirib, o‘zgargan muhitga moslashishga majbur bo‘lganini aytdi.
Guterrish IShID “istilo va hududlarni saqlab qolish yo‘nalishi”dan voz kechib, “hamon tashqi teraktlarga e’tibor qaratayotgan”ligini taxmin qildi.
“BMTga a’zo mamlakatlar IShID va ‘Al-Qoida’ tarmoqlarining ba’zi a’zolari bir-birining operatsiyalarini qo‘llab-quvvatlashga shayligi hamon xavotir uyg‘otishini, ikki tarmoqning qo‘shilish ehtimoli esa yangi tahdidni keltirib chiqarishini qayd etdi”, — deyiladi ma’ruzada.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)