АҚШ халқаро тараққиёт агентлигининг (USAID) Марказий Осиё бўйича минтақавий миссияси директори ўринбосари Сара Уолтер бошчилигидаги АҚШ делегацияси Хоразм вилояти фуқаролик ишлари бўйича Урганч туманлараро судига ташриф буюриб, E-SUD миллий электрон судлов ахборот тизими фаолияти билан яқиндан танишди. Бу ҳақда «Дарё»га USAID’нинг Ўзбекистондаги ваколатхонаси матбуот хизмати хабар берди.
Чет эллик меҳмонлар фуқаролик ишлари бўйича Урганч туманлараро судида дастлаб суд девонхонасида E-SUD тизимининг биринчи инстанциясига оид қисмини, шу жумладан, судга келиб тушган ариза ва даъво аризаларини автоматик тарзда рўйхатга олиниши, масъул судьяларга тақсимланиши, судьялар томонидан тайинланиши, уларни кўриш натижаси бўйича чиқарилган суд ҳужжатларининг тарафларга юборилиши, ишларни кўриш билан боғлиқ статистик маълумотларнинг шакллантирилиши каби электрон тарзда амалга ошириладиган процессуал ҳаракатлар билан яқиндан танишди.
Хорижлик делегация вакилларига тизимнинг ривожланиш босқичлари ва ҳозирги ҳолати, эришилган ижобий натижалар, янги модуль ва хизматларни яратиш ҳамда E-SUD тизимини бошқа ахборот ресурслари билан боғлаш бўйича режалар ҳақида ҳам батафсил маълумот берилди.
Тадбир жараёнида иштирокчиларга лойиҳа доирасида тайёрланган бир нечта китоблар тақдимоти ҳам бўлиб ўтди.
Изоҳ (0)