Италияда ўткинчиларга қарата ўт очилди, ярадорлар бор

Марказий Италиядаги Мачерата шаҳрида машина ойнасидан содир этилган отишма оқибатида бир неча киши яраланди, дея хабар бермоқда Meduza.

Дастлабки маълумотларга кўра, олти киши яраланган. Полиция ахборотида қайд этилишича, уларнинг бари чет эллик — африкаликлар.

Ҳодиса юзасидан 28 ёшли гумонланувчи қўлга олинган. ANSA агентлигининг ёзишича, гумонланувчи қўлга олиниши арафасида қўлини фашистларга хос тарзда юқори кўтарган. Тасдиқланмаган маълумотларга кўра, машина ичида икки киши бўлган.

Ҳодисанинг эҳтимолий сабаблари ҳақида ҳозирча маълумот йўқ. ANSA’нинг қўшимча қилишича, отишма 18 ёшли қизнинг ўлими юз берган шов-шувли ҳудуд яқинида содир бўлган — ўша иш бўйича бир нигериялик қўлга олинган. Шаҳар мерининг маълум қилишича, «икки воқеа содир бўлган жойнинг бир-бирига яқинлиги уларнинг ўзаро боғлиқлиги ҳақида ўйлашга мажбур қилади».

Январь ойи охирида Мачератада 18 ёшли Памела Мастропетронинг тана қолдиқлари топилган эди. Тергов-суриштирув ишлари доирасида келиб чиқиши нигериялик шахс қўлга олинган. Тахминларга кўра, у қизга гиёҳванд модда сотган, сўнг қиз ўлгач, унинг танасини бўлакларга бўлиб, икки жомадонга яшириб қўйган.

Дастлабки маълумотларга кўра, қиз гиёҳванд моддаларни меъёрдан ортиқ истеъмоли оқибатида вафот этган бўлиши мумкин.