Туркиянинг Истанбул шаҳрида «EMIТТ-2018» 22-халқаро сайёҳлик ярмаркаси бўлиб ўтди. Бу ҳақда «Ўзбекистон ҳаво йўллари» МАК матбуот хизмати хабар бермоқда.
Истанбул халқаро сайёҳлик ярмаркаси дунё миқёсидаги йирик халқаро тадбирлардан ҳисобланади. 2018 йилги ярмаркада 80 дан зиёд мамлакатдан 1000 дан ортиқ сайёҳлик фирма ва компаниялари вакиллари, эксперт ва олимлар иштирок этди.
Tuyap Istanbul Fair кўргазма залида ташкил этилган «EMIТТ – 2018» халқаро сайёҳлик ярмаркасида туризмни ривожлантириш давлат қўмитаси, «Ўзбекистон ҳаво йўллари» миллий авиакомпанияси, «Зилол Бахт» меҳмонхонаси ҳамда бир нечта сайёҳлик компаниялари иштирок этди.
«Кўргазмада намойиш этилган «Ўзбекистон ҳаво йўллари» стендида миллий авиаташувчи фаолияти ҳақидаги ахборот материаллари, МАК авиапарки, авиакомпания қатновлари жадвали ва Ўзбекистонга тур-пакетларнинг кўргазма вақтида сотилиши мумкинлиги унга ташриф буюрувчиларни ўзига жалб қилди ва 4 кун давомида нафақат туризм соҳаси вакиллари, балки бевосита кўргазмага ташриф буюрувчиларда ҳам қизиқиш уйғотди», — дейилади хабарда.
Халқаро сайёҳлик ярмаркаси ташкилотчилар томонидан тарихий обидалар ва миллий қадриятлар акс этган «Ўзбекистон» стенди «Энг яхши стенд» деб топилди.
Изоҳ (0)