Ўзбекистон мусулмонлари идораси раиси, муфтий Усмонхон Алимов Россия Федерацияси мусулмонлари диний идораси, Россия муфтийлар кенгаши раиси, Россия президенти ҳузуридаги Диний бирлашмалар билан алоқалар Кенгаши аъзоси, муфтий шайх Равиль Гайнутдинга миннатдорлик мактубини йўллади, деб хабар берди диний идора матбуот хизмати.
Муҳтарам муфтий ҳазратлари, Ўзбекистон Ислом академияси давлат рўйхатидан ўтиб, гувоҳнома олиши муносабати билан Россия Федерацияси мусулмонлари диний идораси ва Россия муфтийлар кенгаши номидан йўллаган табригингиздан кўнглимиз тоғдек кўтарилди. Мамлакатимиздаги ушбу улкан янгиликни Россия мусулмонлари қўллаб-қувватлагани мўмин-мусулмонларимиз қувончини янада оширди.Эслатиб ўтамиз, Россия мусулмонлари идораси раиси Усмонхон Алимовни ислом академияси давлат рўйхатидан ўтказилгани билан табриклаган эди.Сизнинг Ўзбекистон Ислом академияси ташкил этилиши муносабати билан йўллаган илиқ сўзларингиз оммавий ахборот воситалари орқали халқимизга етказилганда ҳамма бирдек мамнун бўлди.
Айниқса, Имом Бухорий, Имом Термизий даврида бўлгани каби бугун муҳтарам Президентимиз Шавкат Мирзиёев қўллаб-қувватлови билан юртимизда исломий олий таълимнинг шонли анъаналари қайта тикланаётгани ҳақидаги фикрларингиз барчамизни жуда ҳам шодлантириб юборди.
Самимий тилакларингизда, Ислом академиясининг динимиз манфаати йўлида муваффақиятли фаолият олиб боришини билдирганингиз учун ташаккур. Биз ҳам ўз навбатида Ислом академияси ишини ривожлантириш, касбий ва илмий салоҳиятни оширишда Сизнинг вакилларингизни кўришдан бахтиёр бўлишимизни изҳор қиламиз.
Ўзбекистон мусулмонлари идораси ва мўмин-мусулмонлар номидан Сиз жаноби олийларига, жамоангизга мана шундай хурсандчилик кунларда чин қалбдан бирга-бирга эканингиз учун самимий миннатдорлик билдирамиз.
Усмонхон Алимов, Ўзбекистон мусулмонлари идораси раиси
Изоҳ (0)