Ўзбекистон Республикаси адлия вазирлигининг кенгайтирилган ҳайъат мажлисида соҳада бундан буён замон талаблари асосида фаолият юритишга эътибор қаратилди, деб хабар беради ЎзА.
Видеоконференцалоқа шаклида ўтказилган йиғилишда адлия органлари ва муассасаларининг барча даражадаги раҳбар ва масъул ходимлари қатнашди.
Ҳайъат мажлисида мавжуд хато ва камчиликлар танқидий таҳлил қилинди. Аҳолига ҳуқуқий хизмат кўрсатиш ишларини ташкил қилишда айрим муаммолар, жиддий камчиликлар кўзга ташланаётганлиги қайд этилди.
«Давлат нотариал идоралари ва ФҲДЁ органлари ходимлари томонидан фуқаролар билан ишлашда ҳанузгача қўпол муомалада бўлиш, уларни сарсон қилиш, кўрсатилган хизматлар учун ортиқча пул маблағлари ундирилиши муроса қилиб бўлмайдиган ҳолатлардир. Бундай камчиликларга йўл қўйганлиги учун 229 нафар нотариат ва 73 нафар ФҲДЁ ходимларига нисбатан кескин чоралар кўрилган. 50 дан ортиқ ходим билан меҳнат шартномаси бекор қилинган», — дейилади хабарда.
Қайд этилишича, мажлисда нотариат аҳолидан энг кўп эътироз тушаётган соҳа экани таъкидланган.
Нотариал идораларда ўтказилаётган рейдлар натижасида нотариусларнинг ишга сурункали равишда кеч келиши маълум бўлган. Бу фуқароларнинг узоқ кутиб қолиши, иши вақтида битмаслигига ва табиийки, норозилигига сабаб бўлган, дея таъкидланади хабарда.
Изоҳ (0)