Тошкент ИИББ маст ҳайдовчилар ва енгилтабиат аёллар фотосуратларини эълон қилиши сабабини тушунтирди

Тошкент шаҳар Ички ишлар бош бошқармаси маст ҳолда машина бошқарган ҳайдовчилар фотосуратларини эълон қилиб борар эди, яқиндан бошлаб эса,  фоҳишалик билан шуғулланувчи аёллар суратларини ҳам расмий сайтида чоп эта бошлади, деб ёзади «Nuz.uz». Бу эса ижтимоий тармоқларда қизғин баҳсларга сабаб бўлган ва кўпчилик томонидан инсон ҳуқуқларининг бузилиши деб баҳоланган эди.

ИИББ бошлиғи ўринбосари Дониёр Тошхўжаев сўзларига кўра, муассаса ушбу ҳолатда кимнингдир ҳуқуқлари бузилган деб ҳисобламайди, чунки бу аёлларнинг ўзлари ўз суратларини ижтимоий тармоқларда ва турли сайтларда эълон қилиб келган. ИИББ эса «бу фактни таъкидлаяпти, холос» деди у бу ишлар «фақат профилактика мақсадида» амалга оширилаётганини қайд этиб.

Шунингдек, маст автомобилчилар суратларини эълон қилиш натижасида статистика аста-секинлик билан яхшиланишни бошлаган. Тошхўжаев айтишича, бу одамлар интернетда тезкорлик билан тарқалувчи «шармандалик тахтаси»га тушиб қолиб, қариндошлари, қўшнилари, ҳамкасблари олдида уялиб қолишдан қўрқиши натижасида бўлмоқда.