Республика ихтисослаштирилган онкология ва радиология илмий-амалий тиббиёт маркази Самарқанд филиали ўз фаолиятига бағишланган тақдимот ўтказди, деб ёзади «Самаркандский Вестник» газетаси.
Айни пайтда муассаса ходимларини малака ошириш учун чет мамлакатларга юбориш, хорижлик мутахассислар билан тажриба алмашиш ишлари олиб борилмоқда.
Ҳиндистоннинг BLK клиникасида самарқандлик маммологлар аввал Ўзбекистонда ўтказилмаган операциялар услубини ўрганиб қайтди. Масалан, Парвина Зарипова лампэктомияни ўтказишни ўрганди.
«Операция моҳияти шундаки, кўкрак бези саратонида шиш жойлашган кўкракнинг фақат бир қисми олиб ташланади, — деди П. Зарипова. — Радикал мастэктомия (кўкракнинг тўлиқ олиб ташланиши) аёл учун стресс ҳисобланади, бу усул эса бемор кўкрагининг 70 фоизигача қисмини сақлаб қолиб, унга руҳий травма бермаслик имконини беради».
Самарқандга қайтгач, шифокор бундай операцияларни амалга оширишга ҳам улгурди.
Нашр қайд этишича, Республика ихтисослаштирилган онкология ва радиология илмий-амалий тиббиёт маркази Самарқанд филиалида 8 хил йўналишдаги 62 та юқори технологияли операциялар ўтказилган. Бундай жарроҳлик аралашувлари ҳатто пойтахтда ҳам олиб борилмайди, дейилади хабарда.
Изоҳ (0)