Тошкент вилоятида ИИБ, прокуратура ҳамда суд идоралари ҳамкорлигида жиноят содир этгач, тергов ва суд органларидан яшириниб юрган фуқароларнинг оила аъзолари ва яқинлари иштирокида мулоқот ҳамда учрашувлар ўтказилмоқда. Бу ҳақда UzNews хабар берди.
Қидирувдаги шахс Ўзбекистон ҳудудидан ташқарида яширинган бўлса, ҳеч қандай тўсқинликсиз ватанига қайтиши, адашиб бу йўлга кириб қолган фуқароларга қонуний енгилликлар берилиши юзасидан тушунтириш ишлари олиб борилмоқда.
Жумладан, Ангрен шаҳрида яшовчи Ботир Ҳамдамов талончилик жиноятини содир этиб, бир неча йиллар мобайнида суд ва тергов органларидан яшириниб юрган. Ангрен шаҳар ИИБ ҳузуридаги тергов бўлими ходимлари томонидан Б.Ҳамдамовнинг оила аъзолари билан олиб борилган мулоқотлар ўз натижасини бериб, у бўлимга ўз ихтиёри билан келди.
Олий мажлис Сенатининг 2015 йил 3 декабрдаги «Ўзбекистон Республикаси Конституцияси қабул қилинганлигининг 23 йиллиги муносабати билан амнистия тўғрисида»ги қарорида оғир бўлмаган жиноятларни қасддан содир этганлиги учун биринчи марта ҳукм қилинган шахслар жазодан озод қилиниши кўрсатилганлиги инобатга олиниб, унга нисбатан қўлланилган «сиртдан қамоққа олиш» эҳтиёт чораси гаров эҳтиёт чорасига ўзгартирилди.
Ботир Ҳамдамов оиласи даврасига қайтди.
Изоҳ (0)