21 январь куни тахминан соат 23:10 ларда Ўзбекистон фуқароси Улуғбек Болтабоев ФВВ Марказий аппаратида фавқулодда вазиятларни олдини олиш бўйича ташкил этилган тезкор штабнинг 147-10-50 телефон рақамига алоқага чиқди. У ўша куни соат 22:50 да Қозоғистоннинг Петропавловск шаҳридан Ўзбекистонга келаётган «Сетра» русумли автобус ҳаво ҳарорати совуқлиги (-40 даража) сабабли дизель ёқилғиси музлаши натижасида йўл четида ҳаракатланмай қолганини маълум қилган. Бу ҳақда Ўзбекистон ФВВ матбуот хизмати хабар қилди.
Салонида 43 нафар Ўзбекистон фуқароси, жумладан 2 нафар ёш бола бўлган автобус Остона шаҳрига 54 км қолганда тўхтаб қолган.
ФВВ Қозоғистон Республикаси ФВҚ ФВБМ ва Ўзбекистон Ташқи ишлар вазирлигига маълумот тақдим этди. Ҳамкорликда кўрилган чоралар натижасида, Қозоғистон Республикаси ФВҚ ва маҳаллий ижро органлари ходимлари томонидан мазкур автобус йўловчилари Шўртанди тумани А-1 «Остона-Боровой» трассаси яқинида жойлашган 5-сонли Агротехника коллежининг ётоқхонасида ташкил этилган исиниш масканига вақтинчалик эвакуация қилинган. Исиниш масканида Ўзбекистон фуқароларига иссиқ жойлар, уч маҳал иссиқ овқат ва тиббий кўрик ташкил этилди.
Ўзбекистон фуқароларини ўз ватанига тезкор қайтариш мақсадида, Ўзбекистон Республикаси ФВВ ва Қозоғистон Республикаси ИИВ ФВҚ томонидан фуқароларга «Ўзбекистон темир йўллари» АЖ поездининг плацкарт вагонлари бепул асосда таклиф этилди. Афсуски, ёмон об-ҳаво ва совуққа қарши огоҳлантиришга қарамасдан, йўловчилар рухсатсиз автобусда йўлга чиқди, фақатгина 5 нафар йўловчигина Қозоғистон Республикаси ИИВ ФВҚ ходимлари томонидан Остона шаҳри вокзалига етказилиб, поездда Тошкент шаҳрига етиб келди.
25 январь куни соат 22:00 да мазкур фуқаролар Тошкент вилояти Тошкент тумани ҳудудидаги «Ғишт кўприк», «Зангиота» ва «Тошкент» чегара назорат ўтказиш пунктлари орқали Республика ҳудудига соғ-омон кириб келди.
Ўзбекистон Республикаси ФВВ Қозоғистон Республикаси ИИВ ФВҚ Оқмола вилояти Фавқулодда вазиятлар департаменти, ҳокимияти, Шўртанди туманидаги 5-сонли Агротехника коллежи раҳбарлари ва ходимларига, шу жумладан, Ўзбекистон Республикаси Ташқи ишлар вазирлигига, «Ўзбекистон темир йўллари» АЖга кўрсатилган ёрдам ва ҳамкорлик учун алоҳида миннатдорчилик билдирди.
Изоҳ (0)