Тошкентда OnePlus 5 смартфони қарийб 4,5 млн сўмдан сотувга чиқди

Ўзбекистонда Хитойнинг OnePlus компанияси смартфонлари сотила бошлади. Шу пайтгача бу смартфонларни фақат буюртма орқали сотиб олиш мумкин эди. Ҳозирча бозорда фақат битта модель — OnePlus 5 таклиф қилинмоқда, деб ёзади «Mobinfo.uz».

OnePlus 5 моделини 8 Гб тезкор ва 128 Гб доимий хотирали топ-версияда сотиб олиш мумкин. Қолган хусусиятларига келсак, девайс 5,5 дюймли Full HD AMOLED-дисплей, Snapdragon 835 чипсети, 12 мегапикселли асосий қўш камера, 16 мегапикселли олд камера, олд панелдаги бармоқ изи сканери, 3300 мА/соат сиғимли аккумулятор, Dash Charge тезкор қувват олиш функциясига эга.

Смартфон Oxygen OS прошивкали Android 7.1.1 Nougat операцион тизимида ишлайди. Тошкентдаги «Малика» савдо марказида OnePlus 5 смартфони 4 428 000 сўмга сотилмоқда.

Ушбу қурилмани кўрсатилган нархда сотиб олишга «Дарё» нашри кафолат бермайди. Қурилма ва унинг нархи ҳақидаги ахборот фақат танишиш учун тақдим этилган.