Кармана туманида яшовчи Лочин Қарчиғаев (исм-шарифлар шартли) 2018 йил 6 январь куни содир этган жиноятига қадар нақд 8 марта фирибгарликни амалга оширган. Унинг жиноятлари даврийлиги худди режалаштирилгандек, орада 2 ёки 3 йилга «танаффус» қилинган, дея хабар беради ЎзА.
Оиласидан ажрашган, 2 фарзанднинг отаси Лочин 6 январь куни Нурота туманига келади. Соат тахминан 11:00 да туманнинг Янгиобод қишлоғида яшовчи фуқаро Т.А.нинг уйига бориб, ўзини Каттақўрғон шаҳрида жойлашган 7-тергов ҳибсхонаси махсус бўлимида ишловчи «майор Собиров» деб таништиради.
Т.А.га Зангиота туманидаги жазони ижро этиш муассасасида жазо муддатини ўтаётган ўғли Х.Б.нинг озодликка чиқарилишида амалий ёрдам кўрсатишини ваъда қилади. Бу сўзларга чин кўнгилдан ишонган онаизор 240 минг сўм нақд пул, 150 минг сўмлик қўл телефони, 500 минг сўмлик кийим-кечакларигача бериб юборади.
Қизиқ, уддабурон «майор» янгиободлик йигитнинг Зангиотада «ўтирганини» қаердан билди экан?
«Майор» шу куннинг ўзида туманда иккинчи тайёр «ўлжа»ни учратади. Янгиобод—Нурота йўналишида қатновчи А.Қ. бошқарувидаги «Тико» машинасига ўтиради. Йўл-йўлакай ҳайдовчини ҳам тузоққа илинтириш қийин кечмади. Гап шундаки, фирибда устаси фаранг Лочин ўзини йўл ҳаракати хавфсизлиги бошқармаси ходими сифатида таништирди.
Соддадил киракашни махсус эвакуаторга ҳайдовчи вазифасига ишга жойлаштириш ҳамда шахсий машинасига арзон нархда газ баллони ўрнатиб беришдек улкан ваъдалар гирдобига ғарқ қилади. Бу сценарий ҳам иш бериб, 1 миллион сўм «фойда» олинди.
Мазкур ҳолатлар юзасидан Нурота тумани ИИБ тергов бўлинмаси томонидан Лочин Қарчиғаевга нисбатан Жиноят кодексининг 168-моддаси 3-қисми «б» банди билан жиноий иш қўзғатилиб, дастлабки тергов ҳаракатлари олиб борилмоқда.
Изоҳ (0)