Ғиждувон туманидаги Гаждумак аҳоли пункти ҳудудида, Бухоро — Тошкент магистрал йўлининг шундоқ ёқасида ҳар куни саксовул, юлғун, ўрик ёғочи ортилган машиналар турнақатор тизилади. Бу ҳақда «Халқ сўзи» хабар бермоқда.
— Келинг, саксовулни 800 минг сўм, деб турибман, ками бор, — дейди автомашина ҳайдовчиларидан бири.
— Юлғун оламан десангиз, арзонлаштириб бераман, — дейди яна бири автоуловга ишора қилиб.
Яна бири эса қизиқувчанлигимиздан хавотирланиб, «Ака, тирикчилик-да» деган кўйи ўзини четга тортади.
Эчкига жон қайғуси, қассобга ёғ, деганларича бор. Шу йўл билан тирикчилик қилаётганлар табиатга нақадар катта зиён етказаётганини ўйлаб кўрганмикин? Ахир, саксовул билан юлғун чўлнинг асосий ўсимликларидан саналади. Қум кўчкиларининг олдини олиш, гармсел шаштини пасайтириш, экомуҳитни яхшилашда уларнинг хизмати беқиёс.
Гаждумакда эса табиий газ йўқ. Тўғри, суюлтирилган газ таъминоти йўлга қўйилган. Аммо у чой қайнатиш, овқат пиширишдан ортмайди. Кўмир таъминоти ҳаминқадар.
Шундай бўлгач, хонадон эгалари юлғуну саксовул ортилган машина эгаларининг «беминнат» хизматидан фойдаланишга мажбур. Бундай оилалар сони, афсуски, кам эмас.
Изоҳ (0)