Вьетнамнинг 23 ёшгача футболчилардан ташкил топган терма жамоаси Осиё Чемпионатининг финалига йўл олди. Бу ҳолатни кўпчилик сенсация билан тенглаштирмоқда.
Ярим финалда чемпионлик учун асосий даъвогар бўлган Қатар билан тўқнаш келган вьетнамлик футболчилар 2:2 ҳисобида дуранг ўйнади ва пенальтилар сериясига кўра зафар қучди. Чорак финалда улар Ироқ билан 3:3 ҳисобида дуранг ўйнаб, яна ўша пенальтилар сабаб муваффақият қозонганди.
Вьетнам гуруҳ босқичини бор-йўғи 4 очко билан босиб ўтганди. Мусобақани Жанубий Кореяга қарши 1:2 ҳисобидаги мағлубият билан бошлаган Вьетнам, кейинроқ Австралияни 1:0 ҳисобида енгган, Сурия билан 0:0 ҳисобида дуранг ўйнаганди.
Қатар эса кетма-кет тўрт беллашувда зафар қучишга эришди. Испаниялик мутахассис бошқараётган жамоа турнирни Ўзбекистонни енгиш билан бошлаганди. 2014 йил қатарлик футболчилар Осиё Чемпионати U19 да ғолиб чиққан бўлиб, 2017 йилга келиб деярли шу авлод Хитойдаги бугунги мусобақага иштирок этаётганди.
Вьетнам эса 2014 йилги мусобақада Япония, Хитой ва Жанубий Корея билан бир гуруҳдан жой олиб, уни 1 очко билан сўнгги ўринда якунлаган. Хитой билан 1:1 ҳисобида дуранг ўйнаган Вьетнам, Япониядан 1:3, Жанубий Кореядан 0:6 ҳисобида мағлуб бўлган. Ўтган 3 йил давомида уларда ўсиш кузатилди.
Осиё Чемпионати U23 Ярим финал 23 январь, сешанба
Изоҳ (0)