ЎФФ иш услуби Испания футбол федерациясиники каби бўлади. Умид Аҳмаджонов испанлар билан келишувга эришди

Испания футбол федерацияси раҳбарияти билан учрашган ЎФФ президенти Умид Аҳмаджонов бир қатор масалаларда келишувга эришди.

Испанияга етиб келган Умид Аҳмаджонов жаҳон чемпиони Хорхе Вальдано билан учрашди

Унга кўра, ўз тизимини тубдан ислоҳ қилаётган Ўзбекистон футбол федерацияси эндиликда иш услубини испанларники каби йўлга қўяди. Бу борада Испания футбол федерацияси ЎФФга амалий ёрдам беради ва ўз мутахассисларини Тошкентга жўнатади.

Шунингдек, Ўзбекистон клублари ҳам иш юритиш системасини Испания клублари каби йўлга қўйишга ҳаракат қилади. Келишувга кўра, март ойида ўзбекистонлик бир қатор мутахассислар иш ўрганиш учун Испанияга боради.

«Реал» 6 та гол фарқи билан зафар қучган ўйинда ЎФФ президенти Фларентино Перес билан учрашди

Умид Аҳмаджонов Испания футбол федерациясида фаолият олиб бораётган машҳур футболчи Фернандо Йерро билан ўсмирлар футболи масаласида ҳам суҳбат қурган. Унга кўра, Ўзбекистон U16 терма жамоаси Европадаги бир қатор футбол турнирларида иштирок этиш имкониятига эга бўлади. Яъни, ҳар икки мамлакат ўсмирларидан ташқари, Германия, Франция, Англия, Италия каби термалар иштирок этадиган мусобақаларга ўзбекистонликлар ҳам таклиф этилиши мумкин бўлади.

ЎФФдаги иш ўринларидан тортиб, унинг фаолият олиб бориш тизимига қадар испанларники билан мувофиқлаштирадиган бўлдик. Бу борада Испания футбол федерацияси мутахассисларининг ўзи бизга амалий ёрдам беради.

Ҳар тарафлама ўйлаб кўрдик, кўряпмизки, клублар миқёсида ҳам, терма жамоалар таснифида ҳам испанияликлар катта ютуқларга эришмоқда. Демак, уларнинг тизимига ҳавас қилишимиз ва ўрганиш объекти сифатида испанларни танлаб олишимиз нормал ҳолат.

Иш фақатгина федерация тизими билан чекланиб қолмайди. Мамлакатимиз клубларидан тортиб, мураббийлар тайёрлаш босқичларига қадар улар билан ҳамкорлик қилишга интиламиз. Режамиз бўйича март ойида бир қатор мутахассисларимиз бўлган Ўзбекистон делегацияси Испанияга иш ўрганиш учун келади.

Умид Аҳмаджонов, ЎФФ президенти

Ташкилот президенти бугун тушдан кейин «Реал Мадрид» футбол академияси раҳбарияти билан кўришади ва унинг филиалини Тошкентда ташкил этиш масаласида фикр алмашади.