Жанубий Корея автомобиль саноатининг етакчи Ажоу мотор коллежи президенти Шин Сунг Ҳо бошчилигидаги делегация Ўзбекистонга ташриф буюрди, деб хабар берди «Ўзавтосаноат» матбуот хизмати.
2018 йилнинг 18 январь куни коллеж президенти Шин Сунг Ҳо ҳамда Тошкент Турин политехника университети ректори Конгратбой Шарипов ўртасида англашув меморандуми имзоланди.
Меморандум доирасида автомобиль саноатининг бир нечта йўналишлари бўйича ҳамкорликда ўқув ва инновацион ишлар олиб боришга келишиб олинди. Бунда автомобиль дизайни, архитектураси, бошқариш тизимлари, электроникаси, диагностикаси ва магистраллардаги навигацияси йўналишлари бўйича ўқув-илмий инновацион стартаплар дастурлари доирасида ТТПУ профессор-ўқитувчилари ҳамда «Ўзавтосаноат» АЖ муҳандис мутахассислари ҳамда Жанубий Корея автомобиль компаниялари GM, Daewoo, Hyundai ва Kia Motors муҳандисларидан ташкил топган Ажоу мотор коллежи профессор-ўқитувчилари билан ҳамкорликда иш олиб боришга келишилди.
Учрашув чоғида ТТПУ ҳамда «Ўзавтосаноат» тасарруфига ўтиши режалаштирилган касб-ҳунар коллежларининг 2 йиллик таълим стандратларини ишлаб чиқиш ҳамда Жанубий Корея тажрибасини юртимиздаги таълим муассасаларига тадбиқ қилиш масалалари муҳокама этилди.
Шунингдек, делегация Ўзбекистонга ташрифи доирасида Тошкент Политехника музейи, «Ўзавтосаноат»нинг Пискентдаги полигони ҳамда GMPТ корхоналарида бўлди.
Daewoo компанияси ташаббуси билан очилган Ажоу мотор коллежи Жанубий Корея автомобиль саноатинг ривожига улкан ҳисса қўшиб келмоқда. Ушбу таълим муассаси Жанубий Кореянинг автомобиль саноати ривожланган марказида бўлиб, у Hyundai, GM Korea ва Kia Motors автомобиль компанияларига мутахассислар тайёрлайди.
Ҳозирги кунда ушбу таълим муассасасида автомобиль саноатинг келажаги бўлган келгуси авлод автомобиллари гибрид, ақлли ва элекромобилларни яратиш кенг йўлга қўйилган.
Изоҳ (0)