Наманган шаҳридаги тиббий муассасаларда Республикада биринчилардан бўлиб «Электрон поликлиника» тизими жорий этилганди. Энди шаҳар марказий шифохонасида MedData автоматлаштирилган ахборот тизими ишга туширилди. Бу ҳақда «Дарё»га вилоят соғлиқни сақлаш бошқармаси матбуот хизмати маълум қилди.
Амалга оширилган лойиҳа боис шифохонанинг барча бўлимлари иш жараёни локал тармоқ орқали ягона тизимга бирлашади. Қабулхона, лаборатория диагностикаси ва текширувлар, даволаш жараёнлари олиб борилаётган барча бўлимларнинг фаолиятига оид маълумотлар тармоқда тўлиқ ифодасини топади.
Бундан беморнинг ўзи ҳам хабардор бўлади. Яъни, даволанувчи лабораторияга текширув учун қон топширган бўлса, таҳлил натижалари бемор ётқизилган бўлимдаги компьютерда кўринади. Шифокорнинг беморларда олиб бораётган амалиётини бўлим мудирлари назорат қилиб туради.
Шуниси аҳамиятлики, беморнинг касаллиги, унинг даволаниши ва муолажалар электрон хотирага муҳрланади. Кўп варақли касаллик тарихларини тўлдириш шарт эмас, маълумотлар электрон база хотирасида акс этади. Натижада касаллик тарихига оид ҳужжатларни архивдан излашга ҳожат ҳам қолмайди.
Касалхона қабулхонасида беморлар электрон баённомасининг очилиши фуқаролар оқимини тезлаштиради. Шу билан бирга, шифохонада даволаниб чиққан фуқароларга саноқли дақиқаларда «Касаллик тарихи»дан кўчирма берилади. Ваҳоланки, илгари бу каби талабларни қондириш учун узоқ муддат кутишга тўғри келар эди.
Янгиликнинг афзал жиҳатлари жуда кўп. Уни вилоят даволаш-профилактика муассасаларида изчил қўллашни ташкил этиш мақсадида шаҳар тиббиёт бирлашмасида «MedData AAT воситасида шифохона бемори электрон тиббий баённомасини юритиш усуллари» мавзуида амалий семинар уюштирилди.
Наманган вилоятидаги яна 10 та тиббиёт муассасида автоматлашган ахборот тизимини жорий этиш устида иш олиб борилмоқда.
Изоҳ (0)