КХДР раҳбарияти шимолий кореялик санъаткорларни 21 январь, якшанба куни Жанубий Кореяга юборишга тайёрлиги ҳақида жанубий қўшнисининг Миллий бирлашув вазирлигига билдирди. Бу ҳақда «РИА Новости» хабар бермоқда.
Жанубий Кореядаги Олимпия тадбирларида иштирок этиши режалаштирилган КХДРнинг «Самчжиён» мусиқий жамоасининг етти аъзоси шанба куни Жанубий Кореяга бориб, томоша жойлари билан олдиндан танишиши лозим эди. Уларнинг жанубга ташрифи икки кун давом этиши кўзда тутилган эди. Бироқ жума куни расмий Пхеньян сафар бекор қилинганини эълон қилди.
Шанба куни Жанубий Корея томони бундай қарор сабабини изоҳлаб беришни Пхеньяндан талаб қилганидан сўнг, Шимолий Корея санъаткорлар якшанба куни жанубга боришини маълум қилди.
«Шимолий Корея томони шимоллик артистлар чиқиш қиладиган жойлар билан олдиндан танишиш мақсадида ташриф буюрадиган гуруҳ 21 январь куни Кёнисон темирйўли орқали йўлга чиқиши ва аввалдан келишилган жадвал асосида ҳаракат қилиши ҳақида жанубдагиларни хабардор қилди», — дейилади расмий ахборотда.
Жанубий Корея Миллий бирлашув вазирлигидан маълум қилишларича, расмий Сеул шимоллик санъаткорлар гуруҳининг якшанба куни келишига розилик билдирган.
Шимолий ва Жанубий Корея ўртасида 15 январь куни бўлиб ўтган музокаралар чоғида Пхёнчхандаги 2018 йилги қишки Олимиаданинг маданий дастурларида КХДРнинг «Самчжиён» мусиқий жамоаси ҳам қатнашиши борасида келишувга эришилган эди.
Изоҳ (0)