Урганч – Хива янги темир йўл линиясини қуришнинг дастлабки босқичи, яъни пўлат излар ётқизиш ишлари давом этмоқда, деб хабар беради «Ўзбекистон темир йўллари» АЖ матбуот хизмати.
Қайд этилишича, шу кунгача умумий узунлиги 29,60 километр темир йўллар ётқизилди.
«Ушбу йўллар замонавий поездларнинг юқори тезликда ҳаракатланишини инобатга олган ҳолда, илғор технологияларга асосланиб, мустаҳкам ва янада сифатли этиб бунёд этилмоқда», — дейилади хабарда.
Урганч – Хива янги темир йўл линияси жорий йилда фойдаланишга топширилиш режалаштирилмоқда. Қурилиш-монтаж жараёнида жами 831 минг метр куб тупроқ ишлари бажарилди. Йўл бўйлаб 124 та сунъий иншоот ҳам барпо этилди. Бунёдкорлик ишлари давомида 6 та йўл ўтказгич ва кўприклар қурилди.
Қурилиш ишларини амалга оширишга 350 нафардан ортиқ тажрибали ишчи-хизматчилар, мутахассислар жалб этилган. Лойиҳани белгиланган вақтида, сифатли ва мустаҳкам қилиб амалга ошириш мақсадида 70 га яқин қудратли техника ва механизмлар самарали ишлатилмоқда.
Лойиҳа доирасида Хива шаҳрида бир вақтнинг ўзида 200 йўловчига хизмат кўрсатиш имконига эга бўлган, миллий услуби уйғунлашган темир йўл вокзали ҳам барпо этилмоқда. Янги қурилаётган вокзал биносининг ташқи кўриниши Хоразм меъморчилиги намуналарини ўзида акс эттиради.
Изоҳ (0)