Республика ихтисослаштирилган педиатрия илмий-амалий тиббиёт марказида Россиянинг Санкт-Петербург шаҳридан ташриф буюрган профессор, тиббиёт фанлари доктори Владислав Кузавков билан ҳамкорликда кохлеар имплантация операциялари бўйича маҳорат дарслари ҳамда чуқурлаштирилган тиббий кўриклар ўтказилди. Бу ҳақда соғлиқни сақлаш вазирлиги ахборот хизмати хабар бермоқда.
Владислав Кузавков нафақат Россияда, балки бутун дунёда етакчи отохирурглардан ҳисобланиб, беш минг нафардан ортиқ эшитишида муаммоси бор болаларда кохлеар имплантация операцияларини ўтказган.
Профессор ўзбекистонлик мутахассислар билан ҳамкорликда 7 нафар бемор болада кохлеар имплантация операцияларини бажариб, 30 дан ортиқ беморларни чуқурлаштирилган тиббий кўрикдан ўтказди.
Маълумот учун, кохлеар имплантация операцияси болалардаги туғма ва орттирилган эшитиш заифлиги хасталигини самарали даволайди. Ушбу амалиёт республика ихтисослаштирилган педиатрия илмий-амалий тиббиёт марказида ҳам муваффақиятли амалга оширилиб келинмоқда.
«Бугунги кунгача марказда 360 нафардан ортиқ болаларда бюджет маблағлари ҳисобидан кохлеар имплантация операциялари муваффақиятли ўтказилган бўлса, 70 нафардан ортиқ беморлар имтиёз асосида, ҳомийлар ва ота-оналар ҳисобидан операция қилинди. Имплантация қилинган болаларни мониторинг қилиш натижалари эса 90 фоиз ижобий. Яъни, уларнинг эшитиш қобилияти тикланиб, гапира бошлади. 7 ёшга кирганлари эса умумтаълим мактабларида ўз тенгқурлари қаторида таҳсил олмоқда», — дейилади хабарда.
Изоҳ (0)