Саудия Арабистони подшоҳлигининг ҳаж ва умра ишлари вазири таклифига биноан Дин ишлари бўйича қўмита раиси ўринбосари Ўткир Ҳасанбоев бошчилигидаги Ўзбекистон делегацияси мазкур давлатга хизмат сафарини амалга оширмоқда. Бу ҳақда қўмита ахборот хизмати хабар берди.
Делегация Саудияда ҳаж тадбирларини ташкил этишга масъул бўлган идора ва ташкилотлар вакиллари билан Жидда, Макка ва Мадина шаҳарларида учрашувлар ўтказмоқда.
Жумладан, делегацияси Саудия Арабистони фуқаро авиацияси бош бошқармаси раҳбарияти билан музокаралар ўтказди. «Ҳаж-2017» мавсумини намунали ташкил қилгани учун Саудия ҳукумати ва бош бошқарма раҳбариятига ташаккур изҳор этилди.
Жидда шаҳрида «ал-Ҳидоя» ширкати раҳбарлари олиҳ Баҳвини ва Усома Тошкандий билан учрашув бўлиб ўтди. Учрашув давомида долзарб масалалар, ҳаж тадбирларини ўтказиш бўйича ҳамкорлик ишлари муҳокама этилди. Навбатдаги умра ва ҳаж мавсумларида зиёратчиларга янада қулай шароитлар яратиш мақсадида Макка шаҳрида ижарага олиниши режалаштирилаётган меҳмонхоналар, у ердаги ҳожилар учун белгиланган хизматлар ва Мино, Арафот ва Муздалифада бажариладиган ташкилий масалалар бўйича фикр алмашилди.
Ўзбекистон делегацияси ҳаж ва умра вазирлигининг Макка шаҳридаги қароргоҳида вазир ўринбосари Абдулфаттоҳ Сулаймон Машат томонидан қабул қилинди. Учрашувда ўтган ҳаж мавсумида ўзбекистонлик ҳожиларнинг Саудия ҳудудидаги амаллари тартибли ва намунали тарзда бажарилгани қайд этилди, ишчи гуруҳ фаолиятига юқори баҳо берилди, келгуси ҳаж мавсумида ҳам биргаликда шундай яхши натижаларга эришишга умид билдирилди.
Ўзбекистон ҳаж делегацияси ўтган ҳаж мавсумини тартибли ва юқори даражада ўтказишда кўрсатилган ёрдам учун шахсан ҳаж вазири Солиҳ Бентин ҳамда вазирлик тасарруфидаги барча идора ва вакилликларга миннатдорчилик билдирди.
Делегация ташрифи давом этмоқда.
Изоҳ (0)