Тошкент вилоятида ноқонуний қум-шағал қазиш билан шуғулланган шахслар жавобгарликка тортилди

Ўзбекистонда қум-шағал назоратсиз қазиб олиниши фавқулодда вазиятлар юзага келиши хавфи ортишига сабаб бўлмоқда. Бу ҳақда ЎзА хабар берди.

Тошкент вилоятида 2017 йилда ўзан тозалаш ва қум-шағал аралашмасини қазиб олиш билан шуғулланувчи 89 корхонанинг 48 таси экологик лойиҳаларни ўз вақтида бажармагани, ноқонуний фаолият юритаётгани аниқланди. Ҳудуддаги дарё ва сув ҳавзалари ўзанини тозалаш, қирғоқларини мустаҳкамлаш ишлари бажарилмаётган 19 ҳолат бўйича масъул шахсларга нисбатан жиноят иши қўзғатилиб, улар 4,5 миллион сўм жаримага тортилди.

— Бошқарма томонидан Юқори Чирчиқ тумани ҳудудидан оқиб ўтувчи Қорасув дарёси ва Қизилсой сойларида ўтказилган ўрганишлар давомида ўзан тозалаш ва қирғоқларни мустаҳкамлаш ишлари билан шуғулланувчи корхоналар умуман фаолият кўрсатмаётгани аниқланди, — дейди вилоят экология ва атроф-муҳитни муҳофаза қилиш бошқармаси сув, ер ресурслари ва ер ости бойликларини муҳофаза қилиш бўлими мутахассиси Абдуғани Бўронов. — Мазкур ҳолат бўйича туман ҳокимлиги томонидан «Қорасув сантехбаза», Create Build, Stone Field ҳамда Kenes масъулияти чекланган жамиятлари учун ажратилган ер майдонларига оид қарорлар бекор қилинди.

Ўтказилган рейдлар натижасида ҳуқуқбузарликка йўл қўйган шахслар қонунда белгиланган тартибда жавобгарликка тортилди. Бундай салбий ҳолатлар Бекобод шаҳри, Пискент, Бўка, Паркент, Оққўрғон ва Оҳангарон туманларида ҳам кузатилди. Дарё ва сойлар ўзанини тозалаш, қирғоқларини мустаҳкамлаш ишлари тошқин сувлари, сел оқимларининг олдини олиш мақсадида амалга оширилишини алоҳида эътиборга олиш зарур.

Ангрен шаҳридаги дарё ўзанларини тозалаш ва қирғоқларни мустахкамлаш ишига масъул бўлган «Ангрен қум шағал инвест», «Дўстлик рамзи», «Ангрен Истиқлол» масъулияти чекланган жамиятлари ҳам ўтган вақт давомида ўз вазифасини бажармаган. Ҳудудда ўтказилган тезкор текширишлар давомида ҳуқуқбузарликка йўл қўйган 3 нафар шахсга нисбатан қонуний чоралар кўрилган.