Давлат статистика қўмитаси маълумотларига кўра, 2017 йил Ўзбекистонда 161,5 минг киши вафот этган. Мос равишда 1000 аҳолига нисбатан ўлим коэффициенти 5,0 промиллени ташкил этиб, 2016 йилга нисбатан 0,1 промиллега ошди.
Мавзуга доир: 2017 йилда Ўзбекистонда қизларга нисбатан ўғил болалар кўпроқ туғилди, аёлларга нисбатан эркаклар кўпроқ вафот этди
Ўлим коэффициенти 2016 йилга нисбатан сезиларли даражада ўсиши Андижон (5,1 промилледан 5,4 промиллега), Жиззах (4,2 промилледан 4,4 промиллега), Қашқадарё (4,1 промилледан 4,3 промиллега), Наманган (4,7 промилледан 4,9 промиллега), Сурхондарё (4,3 промилледан 4,5 промиллега) ва Фарғона (4,8 промилледан 5,0 промиллега) вилоятларида кузатилди.
Жами вафот этганларнинг 8,2 фоизи меҳнатга лаёқатли ёшдан кичик ёшдагиларга (2016 йилда 8,0%), 27,6 фоизи меҳнатга лаёқатли ёшдагиларга (2016 йилда 28,5%), 64,2 фоизи меҳнатга лаёқатли ёшдан катта ёшдагилар (2016 йилда 63,5%) ҳиссасига тўғри келди.
2017 йилда вафот этганлар сони 2016 йилга нисбатан 6,7 минг кишига ўсиб, уларнинг асосий қисми, яъни 74,6 фоизини 60 ёш ва ундан катта ёшдаги аҳоли ташкил этган.
2017 йилда қайд этилган ўлим ҳолатларининг 59,9 фоизига қон айланиш тизими касалликлари 9,3 фоизи ўсимталардан, 6,5 фоизига бахтсиз ҳодиса, заҳарланиш ва жароҳатланишлар, 5,7 фоизига овқат ҳазм қилиш аъзолари касалликлари, 4,8 фоизига нафас олиш аъзолари касалликлари, 1,7 фоизига юқумли ва паразитар касалликлар ҳамда 12,1 фоизига бошқа касалликлар сабаб бўлган.
Изоҳ (0)