АҚШ президенти Дональд Трамп Шимолий Корея етакчиси Ким Чен Ин билан тўғридан-тўғри музокараларга киришиши лозим. Конгресс вакиллар палатасининг Гавайи штатидан аъзоси, демократ Тулси Габбард CNN телеканали эфирида шундай таклиф билан чиқди, деб хабар беради «ТАСС».
«Трампни Шимолий Корея билан тўғридан-тўғри музокаралар ўтказиш, Ким Чен Ин билан музокаралар столига ўтиришга чақираман. Бу Корея ярим оролини ядровий қуролдан холи ҳудудга айлантириш ва Пхеньян юзага келтираётган таҳдидни бартараф этиш учун зарур. Шуниси ҳам борки, музокаралар ҳеч қандай дастлабки шартларсиз ўтказилиши лозим», — таъкидлади конгрессмен.
Габбардга кўра, Пхеньян «АҚШ КХДР тузумини ағдаришига қарши ягона чора деб билгани учун ядро қуролини ишлаб чиқди ва унга маҳкам ёпишиб олди».
«Бу ўнлаб йиллардан бери амалга ошириб келаётган бутун дунёда тузумларни алмаштириш сиёсатимизнинг натижаси», — деди Тулси Габбард.
Эслатиб ўтамиз, олдинроқ Трамп Ким Чен билан «яхши муносабатлари» ҳақидаги даъво ёлғон эканлигини билдирганди.
Изоҳ (0)