Дунёдаги энг катта олмослардан бири Африканинг Лесото қироллигида жойлашган Letseng конидан топилди. Қимматбаҳо тошнинг оғирлиги 910 қиротни ташкил этади, деб хабар берди «Интерфакс».
Рангсиз тош llа типига мансуб, яъни унинг таркибида азот ва бор мавжуд эмас; бу каби олмослар дунёда мавжуд олмосларнинг 1 фоиздан камроғини ташкил этади. Ушбу олмос ўлчами жиҳатидан шу кунга қадар топилган олмослар ичида бешинчи ўринда туради.
2006 йилда Letseng конидан дунёдаги энг йирик 20 та оқ олмоснинг тўрттаси топилган бўлиб, уларнинг каттаси 603 қиротга тенг эди.
Конга эгалик қилувчи Gem Diamonds компанияси ҳозирча топилган ушбу олмосни нима қилишини айтмади ва унинг потенциал нархини баҳолашга ҳаракат ҳам қилмаяпти. Канаданинг Lucara Diamond компанияси ўтган йили 1100 қироқ oғирликка тенг Lesedi la Rona олмосини 53 миллион долларга сотган эди.
Жаҳон рекорди Куллинан олмоси томонидан ўрнатилган бўлиб, унинг оғирлиги 3106 қиротга тенг бўлган. У 1905 йилда ЖАРда топилган. Ҳеч қачон савдога қўйилмаган олмоснинг нархи 2 миллиардга тенг. Куллинан Буюк Британия қироли Эдуард VII га совға қилинган ва тўққизта йирик ҳамда 96 та майда бриллиантларга бўлинган. Уларнинг энг йириги британ қироллиги тожидан ўрин олган.
Изоҳ (0)