Ўзбекистон мусулмонлари идораси 2017 йил декабрь ойи бошида Ҳаж ҳақидаги фатвони эълон қилди. Фатвонинг мазмун-моҳияти юзасидан Ўзбекистон Миллий ахборот агентлиги (ЎзА) диний идора раиси ўринбосари, шайх Абдулазиз Мансур билан суҳбат уюштирди.
Суҳбат давомида шайх баъзилар Ҳажга бориш учун йиллаб навбат кутаётган бир вақтда бошқалар бир неча марта зиёратга боришга улгургани билан боғлиқ ҳолатларга ҳам тўхталиб ўтган.
Ҳажга бир марта бориш фарз, қолганлари нафл ибодатдир. Бир марта Ҳажга бориб, фарз ибодатини бажариб келган ҳожилар навбатини ўзидан кейинги кишиларга бергани маъқул. Негаки, бу ерда икки мўмин фарз ва нафл ибодатини қаршилашаяпти. Агар Ҳаж нафл бўлиб турган киши Ҳаж фарз бўлиб турган кишига ўз навбатини берса, ана шунинг ўзидан ҳам катта савоб олади. Чунки у бир фарз ибодатга йўл очган ҳисобланади.Яна бир жиҳати мусулмонлар бир-бирига кўмакдош бўлиб, бири иккинчисини қўллаб бормоғи даркор. Ана шунда жамиятимизда ўта бойлар ҳам, ўта камбағаллар ҳам бўлмайди. Агар икки мусулмон қўшнининг бири ўта бой бўлса, иккинчиси ўта камбағал бўлса, билингки, уларнинг иймонида нуқсони бор.
Борди-ю, Ҳажга олдин бориб келган киши кейинги Ҳажга атаган маблағларини бева-бечораларга эҳсон қилса, саховатли инсонлар сафидан жой олади. Аллоҳ таоло сахийларнинг мукофотини тайин қилиб: «Молларини Аллоҳ йўлида (яъни яхшилик учун) сарфлаб, сўнгра берган нарсаларини миннат ва озорни эргаштирмайдиган зотлар учун Парвардигор ҳузурида улуғ ажр (мукофот) бордир. Улар учун ҳеч қандай хавфу хатар йўқ ва улар ғамгин бўлмайдилар» (Бақара сураси, 262-оят), деб қўйган.
Шайх Абдулазиз Мансур, Ўзбекистон мусулмонлари идора раиси ўринбосари
Изоҳ (0)