«Ўзтрансгаз» акциядорлик жамияти Фарғона вилояти филиали участкаларидаги турнақатор навбатлар, ортиқча оворагарчиликлар мутасаддиларни қизиқтирмайди, шекилли. Эрталабдан навбатга ёзилсангиз, кечга бориб тўловни амалга оширишингиз, баъзан икки-уч кун қатнашингиз ҳам мумкин, дея хабар беради ЎзА.
Соат 11:30 лар чамаси. Фарғона шаҳар газ таъминоти участкасидамиз. 100 дан зиёд истеъмолчи тўловни амалга ошириш, ҳисоб-китоб қилиш учун навбат кутмоқда. Билишимизча, бу ерда «Ўзтрансгаз» акциядорлик жамиятининг тўрт нафар ходими ҳисоб-китоб учун масъул этиб бириктирилган.
Фарғона шаҳар газ таъминоти участкасининг техник ходими Саёҳатхон Охунжонованинг айтишича, бундай ҳолатга ҳар куни дуч келасиз. Компьютерда ўтирган масъул ходим бир кунда ўртача 30 нафар истеъмолчи билан ишлаши мумкин. Бу ерга эса ҳар куни 200 дан ортиқ истеъмолчи мурожаат қилади. Ўз-ўзидан аёнки, тўрт нафар ходимнинг бунга имконияти ҳам, вақти ҳам етмайди.
«160-бўлиб рўйхатга ёзилдим. Энди 27-чи навбат келди. Бу ерда ҳамиша шундай. Табиий газ ҳақини ўз вақтида тўлаб қўйгани келсак ҳам соатлаб вақтимизни йўқотамиз. Биз-ку ёшмиз, қария отахон ва онахонларга қийин-да», — дейди Муҳаммаджон Абдуллаев.
Хонадонингиздаги табиий газ бўйича ҳисобни билиш учун дастлаб мижозлар билан ишлайдиган хонага кирасиз. Албатта, навбатингиз келса... Ундан кейин банк шохобчасида навбат кутасиз. Бу ерда «Ипотекабанк» акциядорлик тижорат банкининг Фарғона филиали шахобчаси фаолият кўрсатиб, уч нафар ходимнинг қўли-қўлига тегмайди. Наҳотки банк мутасаддилари бу ердаги ходимлар сонини кўпайтириш, тўловларни вақтида ундириш ҳақида ўйламаса?
Ҳа, бу ердаги шароитдан ҳам эътирозлар кўп. Ҳисоб-китоб билан шуғулланадиган кадрлар камлиги, истеъмолчилар учун ҳеч қандай шароит яратилмагани ўз хоҳиши билан пул тўлашга келаётганнинг ҳам ҳафсаласини пир қилади.
Изоҳ (0)