2017 йилда ОАВ ва ижтимоий тармоқларда фойдасиз деб чиқиндига ташлаб юборилган буюмлардан маҳсулот ишлаб чиқариб, миллионлаб фойда кўраётган нукуслик тадбиркор-ихтирочи Рашид Қартбаев ҳақида шов-шувли маълумотлар тарқалганди. Бу ҳақда ЎзА хабар бермоқда.
Хабарларда унинг Нукус шаҳридаги кўп қаватли уйлар ертўласини тозалагани, касаллик тарқатаётган ҳашаротларга қарши курашаётгани, тозаликни сақлаш борасида амалга оширган тарғибот-ташвиқот тадбирлари, корхонасидан чиққан чиқиндилардан полимер шифер, брусчатка, ташландиқ кийим ва матолардан гулқоғоз, суякдан суяк уни ишлаб чиқаргани, қумликда жойлашган корхонаси атрофида қовун, пахта, ошқовоқ каби экинлар, ҳатто, гужум дарахти эккани билдирилганди.
Маълумотларга кўра, тадбиркор кераксиз деб топилган чиқиндилардан 2017- йили 1,2 миллиард сўм фойда кўрди.
Мутахассислиги биолог бўлган Р.Қартбаев болалиги ўтган «Назархан» овул фуқаролар йиғини ҳудудида истиқомат қилувчи, оиласи билан хорижда ишлаб пул топаётган кишиларга бўш ётган ердан фойдаланиш, миллионлаб фойда кўриш мумкинлигини тушунтиришга ҳаракат қилмоқда.
«Овул фуқаролар йиғини раисидан четда ишлаб юрган фуқаролардан тўрттасини топиб беринг, ердан унумли фойдаланса, яхшигина даромад олиши мумкинлигини исботлаб бераман, дедим. Менга ишонмади шекилли, топиб бермади. Ўзим 7 сотих ери бор шундай бир кишини топдим ва у билан шу ерда 70 тонна тарвуз етиштиришга келишдик. Ҳозир ерни тайёрлаб қўйибман. Баҳорда ишга киришиб, ваъдамнинг устидан чиқишга ҳаракат қиламан. 2017 йилда ташландиқ маҳсулотлардан унумли фойдаландим. Суякдан ун ишлаб чиқариб, уни омихта емга аралаштирдим ва шу билан 300 та жўжа боқдим. Бу ҳам менга қўшимча даромад келтирди», – дейди Р.Қартбаев.
Рашид Қартбаев тўкилган баргдан экологик уй қуришни ҳам ихтиро қилди. Бироқ энди буниси бошқа ҳикоя.
Изоҳ (0)