Ўзбекистон Ёшлар иттифоқи Навоий вилояти кенгаши раиси Жиноят кодексининг 246-моддаси (Контрабанда) 1-қисми билан айбланган Элёр Бўриевга оид жиноят иши бўйича жамоат ҳимоячиси сифатида иштирок этди, деб хабар беради ЎзА.
Суд айбланувчининг қилмишини ўзи тўла англамаган ҳолда содир этгани, муқаддам судланмагани, қилмишидан чин кўнгилдан пушаймонлиги, содир этган қилмишининг жиноят эканини тушуниб етмагани инобатга олиб, унга нисбатан қўлланилган 3 йил муддатга озодликдан маҳрум қилиш билан боғлиқ жазони бекор қилди ва судланувчи Ўзбекистон Ёшлар иттифоқи кафиллиги остида суд залидан озод этилди.
Тошкент давлат шарқшунослик институтини тамомлаган Элёр Хитойнинг Хэнань университетига ўқишга кирган эди. Муассасада 2016 йилнинг 10 сентябридан 2017 йил 30 июнига қадар таҳсил олиб, университетни аъло баҳоларга тугатди. Хитой, испан, рус, инглиз тилларини пухта ўзлаштирди, дея таъкидаланади хабарда.
«Мен, аввало, Президентга ўз миннатдорлигимни билдираман. Ўзимга, билимимга ишонаман ва келажакда юртимга нафи тегадиган етук кадр бўлишга ваъда бераман. Юртим тараққиётига муносиб ҳисса қўшишда барча имкониятларимни ишга соламан», — дейди Элёр Бўриев.
Изоҳ (0)