Ўзбекистон Мактабгача таълим вазирлигида Чоннам университети (Chonnam National University) вакиллари ҳамда кореялик ишбилармонлар билан учрашувлар бўлиб ўтди. Бу ҳақда вазирлик ахборот хизмати «Дарё»га маълум қилди.
Хабар беришларича, таълимнинг юқори сифати, ўқитувчилар таркиби, ривожланган инфратузилмаси ва фаол илмий-тадқиқот фаолияти билан танилган Чоннам университети Ўзбекистон Мактабгача таълим вазирлигининг асосий ҳамкорларидан бири саналади.
Учрашувда мактабгача таълим соҳасидаги ҳамкорликнинг долзарб жиҳатлари кўриб чиқилган, Ўзбекистондаги вазирлик ва Жанубий Кореядаги олийгоҳ ўртасида ўзаро тажриба алмашиш масалалари муҳокама қилинган.
Ишбилармонлар билан учрашувда Корея томони мактабгача таълим соҳасидаги муносабатларни янада ривожлантириш ниятини билдирган. Хусусан, кореялик инвесторлар Ўзбекистонда болалар боғчаларини қуришга тайёрлигини маълум қилган.
«Ҳамкорлар Ўзбекистонда корейс модели асосида намунавий боғча қуриш истагини билдирди, шунингдек, Ўзбекистондаги мактабгача таълим муассасалари учун мебел ва инвентарлар ишлаб чиқаришни ташкил этиш масалалари кўриб чиқилди», — дейилади вазирлик ахборотида.
Изоҳ (0)