Иван Таврин Алишер Усмоновнинг телевизион активларини сотиб олди

«Мегафон» компаниясининг собиқ бош директори Иван Таврин «Новий Медиа Холдинг» МЧЖ («ЮТВ» холдингининг бош компанияси)нинг 58,29 фоиз акцияларини бизнесмен Алишер Усмоновдан сотиб олиш бўйича битимни якунлади, деб ёзади Forbes.

Олди-сотди қиймати ва тафсилотларини томонлар вакиллари маълум қилмади.

Олди-сотди натижасида Таврин «ЮТВ» холдингидаги ўз улушини 100 фоизгача етказди. Бундан ташқари, у «ЮТВ»га тегишли бўлган бошқа телехолдинг — «STS Медиа»нинг 75 фоизи устидан назорат ўрнатди.

«Мен жаноб Усмонов ва USM холдингидан актив ўз тараққиётининг янги босқичини бошлаши учун қулай шаклда бўлишига қўшган катта ҳиссаси учун жуда миннатдорман», — деди Таврин.

USM Holdings (Усмоновнинг активларини бошқаради) директорлар кенгаши аъзоси Иван Стрешинскийнинг сўзларига кўра, телевизион активлар холдинг учун ҳеч қачон профилли бўлмаган, Таврин учун эса доим устувор бўлиб келган.

Аввалроқ россиялик миллиардер, USM Holdings эгаси Алишер Усмонов «ЮТВ» телевизион холдингидаги улушини сотиб, телевизион бизнесни тарк этаётгани хабар берилган эди.