Янги йил кечаси Гиннес рекордлар китобига кирган Дубайдаги лазер шоуси қайта намойиш этилмоқда (видео)

Янги йил кечасида «Энг кенг кўламли лазер ва товуш шоуси» сифатида Гиннес рекордлар китобига киритилган Light Up 2018 Дубайда ҳафта охиригача қайта намойиш этилади. Бу ҳақда «РИА Новости» хабар берди.

Light Up 2018 илк бор дунёдаги энг баланд иншоот — Бурж Халифадаги анъанавий мушакбозлик ўрнига намойиш этилди. Томошабинлар тахминан 5 дақиқа давомида минора, унга қўшни осмонўпар бинолар, машҳур ўйновчи фаввораларда лазер проекцияларни кузатди. Шоу миллий рамзлар билан тўла бўлиб, унинг ярмида минорада парвоз қилаётган улкан лочин тасвири пайдо бўлди.

Олдинги шундай рекорд Гонконгда 2013 йилда қайд этилган ва лазер проекцияси майдони 46 минг квадрат метрдан ошганди. Дубай шоуси бундан икки баробар кўп — 109 минг квадрат метр майдонни эгаллади.

https://youtu.be/vW9STRWbm14