Номаълум эркак Airbnb сервиси орқали Огайо штатининг Севен Хиллс шаҳридаги уйни бир кечага 40 доллар эвазига ижарага олган. Уйнинг 28 ёшли эгасини бир нечта талаби бўлган: масалан, уйда турли базмларни ўтказмаслик, шунингдек, айрим хоналарга кирмаслик. Бу ҳақда Fox8 телеканалига таяниб, TJournal хабар берди.
Бу каби чекловлар ижарачига базм уюштиришга халақит қилмади: у Twitter’га пост жойлаштириб, 5 доллар эвазига одамларни Янги йил базмига таклиф қилган. 30 декабрь куни меҳмонлар келишни бошлаганини кўрган уйнинг эгаси ваҳимага тушиб, ётоқхонасига яшириниб олган.
Меҳмонларнинг беш нафари таҳдид қилишни бошлагач, уйнинг эгаси полицияни ёрдамга чақирган. Етиб келган ҳуқуқ-тартибот ходимлари уй ташқарисида 30 га яқин одам юрганини кўрган.
Уйнинг ичида эса салкам 250 нафар меҳмон бўлиб, уларнинг аксарияти алкоголь ичимликларни ичиб, марихуана чеккиш билан шуғулланган.
Полиция уй эгасининг шикоятига асосан, меҳмонлардан бу ерни тарк этишларини сўраган, бироқ улар полицияни сўка бошлагач, ходимлар ёрдамчи кучларни чақиришга мажбур бўлган. Шундан сўнг 20 нафар ҳуқуқ-тартибот ходимлари етиб келган. Полициячиларнинг бир қисми, уйга бошқа одам келмаслиги таъминлаш мақсадида йўлни тўсиб қўйган.
Барча меҳмонларни тарқатиб юбориш учун бир соат вақт кетди. Полиция офицерларидан бири меҳмонлардан айримлари «бу каби 5 долларлик кечалар одатда полиция келгунига қадар давом этишини, шундан сўнг улар бошқа уйга боришлари»ни сўзлаганини эшитиб қолган.
Airbnb’нинг маълум қилишича, сервисга нисбатан бу турдаги муносабат баъзида ҳолларда учраб туради ва улар кечирилмайди. Шу сабабли эркак энди ҳеч қачон сервис хизматидан фойдалана олмайди. Шунингдек, унга нисбатан вояга етмаганларга спиртли ичимлик тарқатиш, йўлларда тирбандликларни юзага келтириш ҳамда ўзганинг шахсий мулкига зарар еткаш каби айбловлар билдирилиши мумкин.
Изоҳ (0)