Мирзиёевнинг Тошкент вилоятига сафари, Деновда тайёрланадиган мегапалов, Қибрайда ёниб кетган памперс заводи ва куннинг бошқа муҳим хабарлари

5 январнинг эътиборга молик янгиликлари — «Дарё»нинг кечки дайжестида.

1. Ўзбекистон Президенти Шавкат Мирзиёев Тошкент вилояти бўйлаб сафар қилди. У Зангиотадаги логистика марказини бориб кўрди, янгийўлликлар билан учрашди, Бўстонлиқни картошкачиликка ихтисослаштириш кераклигини айтди.

2. GM Uzbekistan автомобилларига аксиз солиғи 5 баробар камайтирилди. Ўтган йилнинг бошида GM Uzbekistan АЖ енгил автомобилларига аксиз солиғи ставкаси 29 фоизга тенг бўлган.

3. Тошкентдан Чимкентга илк автобус жўнаб кетди. 8 январдан мунтазам қатновлар йўлга қўйилади. Куни кеча Қозоғистондан Ўзбекистонга товарларни олиб киришдаги 10 долларлик чеклов амалда 1000 долларгача оширилгани ҳақида хабар берилган эди.

4. Қибрайда болалар тагликлари заводи буткул ёниб кетди. Завод Sof Gigienik компаниясига тегишли бўлиб, бу ерда Jonny Baby савдо белгиси остида маҳсулотлар тайёрланган.

5. «Абу Сахий»нинг номи «Тошкент ипак йўли»га ўзгаргани ҳақидаги илк расмий маълумотни Президент матбуот хизмати берди. Номи ўзгаргач, давлат бюджетига бозордан аввалгига нисбатан 14 баравар кўп пул туша бошлаган.

6. Сурхондарёда 14 январь куни 9 тонналик ош тайёрланади. Деновлик ошпазлар дунёдаги энг катта ҳажмли паловни тайёрлаш бўйича рекордни янгилаш ниятида.