Хитойнинг China Railway Tunnel Group компанияси «Шарғункўмир» АЖни йилига 900 минг тоннагача тошкўмир қазиб чиқаришга етказган ҳолда уни модернизация қилиш бўйича инвестиция лойиҳасини амалга оширади, деб хабар берди «Kommersant.uz».
Унга кўра, хитойлик мутахассислар эски 10-шахтанинг ёпилиб қолган 1500 метр масофадаги қисмини тозалаш, яна қўшимча 2227 метр туннель қисмини қазиш ишларини олиб боради. Шу билан бирга 6-шахтани қазиш ва уни 10-шахта билан туташтириш ишларини амалга оширади.
Лойиҳанинг умумий қиймати 105,5 миллион АҚШ долларини ташкил этади. Бунёдкорлик ишларини 2020 йилнинг биринчи чорагида якунлаб, кўмир қазиб олишни бошлаш режалаштирилган. Бунинг натижасида қўшимча 450—500 дан зиёд янги иш ўринлари яратилади. Янги техника ва технологиялар жорий этилади. Хориждан энг замонавий, юқори самарадорликка эга бўлган кўмир қазиш ускунаси олиб келинади.
«Шарғункўмир» акциядорлик жамияти маҳсулотларини халк хўжалигига ўз вақтида етказиб бериш, иш унумини янада ошириш мақсадида ташиш хизматларига ҳам алоҳида эътибор қаратилган. Жумладан, бу ерда умумий узунлиги 20 километр бўлган янги темир йўллар ётқизилади. Шу билан бирга мавжуд магистраллар қайтадан реконструкция қилинади.
Шарғун кўмир кони энг бой захирага эга маскан ҳисобланиб, ундаги хом ашё ҳажми ҳисоб-китобларга қараганда 33 миллион тоннадан ортиқни ташкил этади. Бойсундаги конининг захираси эса мутахассислар томонидан 29 миллион тоннадан ортиқ деб баҳоланган. Ҳозирда корхонада 500 нафарга яқин кончилар меҳнат қилишётган бўлса, модернизация ишларидан сўнг бу кўрсаткич яна шунчага ортади.
Изоҳ (0)