«Афғон шамоли» ва бошқа кўплаб роман ҳамда қиссалар муаллифи Исоқжон Нишоновнинг Ўзбекистоннинг Биринчи Президенти Ислом Каримов хотирасига бағишланган «Жасорат» номли романи чоп этилди, деб хабар берди «Namnews.uz».
Мазкур роман «Наманган» нашриёти томонидан тайёрланиб, Тошкентдаги «Ёш куч пресс матбуоти» босмахонасида чоп этилди ва тез кунларда китобхонлар қўлига етиб боради.
Хусусан, романга 1991 йилда Наманганда юзага келган қалтис вазият, уни бартараф этиш учун етиб борган Ислом Каримовнинг ташаббуси асос қилиб олинган. Маълумки, ўша йилларда Наманганда турли диний оқимлар, «Адолат», «Ислом лашкарлари» каби норасмий тузилмалар пайдо бўлиб, улар халқпарварлик ниқоби остида шўро истибдодидан эндигина қутилган ва ҳали келажагини аниқ-тиниқ тасаввур қилишга ҳам улгурмаган халқни чалғитиб, конституцион тузумга қарши фаолият бошлаган эди.
«Аслида бундай илоҳий жасорат ва заковатни қалам билан, сўз билан таърифлаб бўлмайди. Агар ўша пайтда Биринчи Президентимиз бундан бошқача йўл тутганида, балки тарих чархпалаги терс айланиб кетган бўлиши, бугунгидай фаровон ҳаёт халқимиз учун узоқ йиллар орзу бўлиб қолиши мумкин эди, худо асрасин. Мазкур асар воситасида ўша фожиали кунлар ҳақида, жасорат ва матонатнинг олий намунаси ҳақида китобхонлар қалбида таъсирчан бир тасаввур, бугунги кунларга шукроналик туйғуларини уйғота олган бўлсам муродим ҳосил бўлади», — дейди Исоқжон Нишонов.
228 саҳифадан иборат романда ўша алғов-далғов йиллар воқеалари ишончли манба, далил ва маълумотлар асосида бадиий ифода этилган. Асар қаҳрамонларининг барчаси ўз прототипга эга эканлиги таъкидланади хабарда.
Изоҳ (0)