Декабрь ойи ўрталарида (17—18 декабрь кунлари) Тошкентдаги энг йирик буюм бозорларидан бири — «Абу Сахий»нинг номи ўзгараётгани ҳақида хабарлар пайдо бўлди. Бунга бозорнинг турли кириш жойларидаги пешлавҳалардан «Абу Сахий» ёзуви олиб ташлангани сабаб бўлди.
Дастлабки хабарларда бозор «Буюк Ипак йўли» ёки «Тошкент ипак йўли» деб янгидан номланиши айтилган, бироқ бу хабарлар расман тасдиқланмаган эди. «Kun.uz» нашри ўз манбасига асосланиб, «компаниянинг янги номдаги ҳужжатлари тегишли идораларда рўйхатдан ўтиши билан, оммага эълон қилиниши» ҳақида хабар берган эди.
22 декабрь куни «Дарё» мухбири «Абу Сахий»да бўлиб, бозор маъмурияти вакиллари билан учрашди. Маъмурият вакили бозорнинг номи ҳақиқатан ўзгаргани ва энди у «Тошкент савдо маркази» деб аталишини маълум қилган, бозорнинг номида «ипак йўли» бирикмаси бўлиши мумкинлиги ҳақидаги хабарларни тасдиқламаган. Шу куни бозорнинг фақат битта кириш жойида «Тошкент савдо маркази» ёзувини кўриш мумкин эди — қолган жойларга фақат «савдо маркази» жумласи ўрнатилганди.
5 январь куни бозорнинг номи ўзгаргани илк бор расман маълум қилинди — Ўзбекистон Президенти матбуот хизмати собиқ «Абу Сахий» масъулияти чекланган жамияти «Тошкент ипак йўли» мажмуасига айлантирилганини эълон қилди.
Қайд этиш жоиз, 5 январь куни ҳам бозор дарвозаларида «Тошкент ипак йўли» эмас, балки «Тошкент савдо маркази» ёзувларини кўриш мумкин эди. Facebook’даги «Потребитель.уз» гуруҳи фойдаланувчилари тахминига кўра, бу машҳур бозор, номи қандай ўзгаришидан қатъи назар, халқ орасида ҳали яна кўп йиллар давомида «Абу Сахий» деб аталаверади.
Изоҳ (0)