Шавкат Мирзиёев «Ўзбекистон Республикаси Вазирлар Маҳкамаси ҳузуридаги Миллий антидопинг агентлиги фаолиятини ташкил этиш тўғрисида»ги қарорни имзолади. Бу ҳақда Ўзбекистон Президенти матбуот хизмати хабар берди.
Мазкур ҳужжат соғлом ва хаққоний спортни тарғибот қилиш ҳамда Бутунжаҳон антидопинг агентлигининг кодекс ва стандартларини Ўзбекистонда самарали амалга ошириш, Ўзбекистон Республикаси спортчиларининг 2020 йил Токиода (Япония) бўлиб ўтадиган XXXII ёзги Олимпия ва XVI Паралимпия ўйинларига тайёргарлигига барча шарт-шароитларни яратишга қаратилган.
Миллий антидопинг агентлиги зиммасига Бутунжаҳон антидопинг агентлигининг антидопинг бошқаруви ва менежменти (ADAMC) махсус дастурини республикада жорий этиш ва қўллаш масъулияти юклатилган. Мазкур дастур орқали агентликни фаолиятини самарали ташкил этиш ва бутунжаҳон тезкор маълумотлар базаси ахборотларидан фойдаланиш имконияти яратилади.
Мусобақа ва мусобақалардан ташқари бўлган давр мобайнида допинг-тест жараёнларидан Ўзбекистон спортчилари ўтиши тўғрисида аниқ ахборот шаклланади ва допинг-назорат тизими ташкил этилади. Спортчилар дори воситаларидан терапевтик мақсадларда фойдаланиши ва тақиқланган дори воситаларидан фойдаланмаслиги тўғрисида аниқ тавсиялар бериш механизми ва самарали антидопинг тизими жорий этилади.
Қарор билан, шунингдек, Миллий олимпия қўмитаси ҳузуридаги Республика спорт тиббиёти илмий-амалий марказининг «Миллий антидопинг хизмати» негизида «Спорт психологияси бўлими»ни ташкил этиш кўзда тутилган. Шунингдек, агентлик таркибида 3 та бўлим ва 2 та комиссия ташкил этилиши натижасида спортчилар, мураббийлар, спорт тиббиёти ходимлари ва бошқа мутахассисларга соғлом ва хаққоний спорт тарғиботи ҳамда тақиқланган дори воситалари ёки услублар назоратини таъминлаш каби қатор муҳим вазифаларни амалга ошириш белгилаб берилган.
Маълумот учун, Ўзбекистон 2010 йилда Спортда допингга қарши кураш бўйича халқаро конвенцияни ратификация қилган.
Изоҳ (0)