Наманганда «Қишлоқичимликсувтаъминот» МЧЖ томонидан Поп туманидаги 11 та маҳалла ҳудудига тоза ичимлик суви етказиб бериш бўйича иш бошлаб юборилди. Бу ҳақда «Дарё»га журналист Темурмалик Воҳидов маълум қилди.
«Жийдали сой» сув омборидан тумандаги Миришкор, Ғурумсарой, Янгиер, Иттифоқ, Боғ, Тошқўрғон, Тепақўрғон, Янгиобод, Бирлашган, Водий, Янгичек маҳаллалалари аҳолисини узлуксиз ичимлик суви билан таъминлаш бўйича лойиҳа ишлаб чиқилди.
Мазкур лойиҳа амалга ошгач, 5880 хонадон, 30 мингдан ошиқ киши ичимлик суви билан узлуксиз таъминланади.
«Қишлоқичимликсувтаъминот» МЧЖ раҳбари Олимжон Шариповга кўра, 5,7 миллиард сўм эвазига амалга оширилаётган лойиҳа жорий йил Наврўз байрамига қадар бажарилиши режалаштирилган.
Изоҳ (0)