Ўзбекистон профессионал футбол лигаси мамлакат Супер Лигасининг 2018 йилги мавсум учун регламентини тасдиқлади. Унга кўра, чемпионлик учун республиканинг энг кучли 12 та клуби кураш олиб боради.
Супер Лиганинг барча ўйинлари жонли кўрсатилиши мумкин. ЎФФ Sport-TV ва UzReport билан келишувга эришган
Мазкур 12 клуб уй-сафар тизимида жами 22 та турни ўтказади. Яъни, ҳар бир клуб 11 та уй ва 11 та сафар ўйинида иштирок этади. Шундан сўнг, дастлабки олти ўринни эгаллаган клублар чемпионлик учун алоҳида курашни давом эттиради. Қолган олти клуб эса Про-Лигага (собиқ Биринчи Лига) тушиб кетмаслик ҳаракатини қилади. Бунда ҳар бир жамоа яна 5 та уй ва 5 та сафар беллашувида иштирок этади. Шу тариқа, олий дивизионнинг ҳар бир жамоаси жами 32 та тур ўтказади.Мазкур регламент «олтин очко» қоидаси бўйича ишлайди. Масалан, 22-турдан кейин чемпионлик учун кураш олиб бориши керак бўлган олти жамоанинг аввалги ўзаро ўйинлари натижаси сақлаб қолинади. 7—12-ўринни эгаллаган жамоаларга қарши ўйинлари натижаси эса «0» га тенглаштириб юборилади.
Ўз навбатида, қуйи олтилик жамоаларини ҳам шундай тақдир кутади. Уларнинг ўзаро ўйинлари натижаси сақлаб қолинади. Чемпионлик учун курашиши керак бўлган олти жамоага қарши ўйинлари натижаси эса унутилади.
Супер Лигада сўнгги ўринни эгаллаган жамоа қуйи дивизионга сургун бўлади. Про-Лига чемпиони эса Супер Лигага қўшилади.
Шунингдек, Супер Лигада 10 ва 11-ўринни эгаллаган жамоалар элитадаги ўрнини сақлаб қолиш учун Про-Лиганинг 2 ва 3-ўрнидаги клубларга қарши ўтиш ўйинларида иштирок этади.
Изоҳ (0)