Mirzo Ulugbek Innovation Center Инновация маркази ва «Алоқабанк» АК ўртасида Ҳамкорлик ва ўзаро келишувлар тўғрисидаги Меморандум имзоланди. Бу ҳақда марказ расмий сайтида хабар берилди.
2018 йилнинг январь ойи биринчи саналаридан бошлаб Mirzo Ulugbek Innovation Center Инновация маркази резидентлари, «Резидент» имтиёзли тарифи остида амал қиладиган, ўзида «бошидан охиригача» барча босқичларни мужассам этган банк хизматидан фойдаланиши мумкин. Ушбу хизмат «Алоқабанк» АК мутахассислари билан ҳамкорликда ишлаб чиқилган бўлиб, резидентларга қатор устунликлар ва имтиёзларни тақдим этади. Энг муҳими эса, уларни банк операцияларини амалга оширишда юзага келадиган барча бюрократик масалаларни ҳал этишдан озод қилади.
Шунингдек, Инновация маркази ходимлари «Алоқабанк» АК мутахассислари билан ҳамкорликда, IT соҳасидаги стартап-лойиҳаларни амалга ошириш учун молиялаштириш механизмларини аниқлаштириш ва инвестицияларни жалб этиш бўйича консультациялар бера бошлайди.
Бу чоралардан асосий мақсад – резидентларни бюрократик тўсиқларни мустақил равишда енгиб ўтиш шартидан озод қилган ҳолда, уларнинг ишларини максимал даражада енгиллаштириш ва IT-компаниялар учун фақатгина ўз фаолиятлари билан шуғулланиш имкониятини яратишдир.
Бундан ташқари, банк соҳасининг ички «ошхонасини» ўрганиш Инновация маркази ходимларига экспорт-импорт операцияларни амалга ошириш вақтида резидентлар тўқнаш келадиган амалдаги қийинчиликларни аниқлаш, уларни ечиш йўлларини кўзда тутиш ва кейинчалик қонунчиликни такомиллаштириш бўйича таклифлар киритишда ёрдам беради.
Изоҳ (0)