“O‘zbekiston” telekanalining “Uchburchak” tok-shousining so‘nggi — 23-dekabrda efirga uzatilgan soni ijtimoiy tarmoqlarda muhokamalarga sabab bo‘ldi. Ko‘rsatuvda muammosi ko‘rsatilgan ayollardan biri ichkilikka ruju qo‘ygan erining axloqsizligidan shikoyat qilgan. “Daryo” jabrdiyda ayolning kechmishini qisqacha bayon qiladi.

Dildora Baratova.
Kadr: “O‘zbekiston” telekanali / “Uchburchak” ko‘rsatuvi

Mirobodlik Dildora Baratova — to‘rt yashar qizaloqning onasi, turmush qurganiga besh yil bo‘lgan. U oilasini saqlab qolish, turmush o‘rtog‘ini to‘g‘ri yo‘lga solish, turli g‘iybat gaplar chiqmasligi uchun ko‘p uringan, biroq hozirga kelib farzandining tirik yetim bo‘lishiga rozi.

Uning turmush o‘rtog‘i ichkilikka qattiq ruju qo‘ygan — yangi kuyovligining 13-kunida uyga o‘ta mast holda kelib, xotinini tanimay, onasi (Dildoraning qaynonasi)ning ham qarshiligiga qaramay, Dildorani do‘pposlab, uni podyezdga chiqarib qo‘ygan. To‘ygacha ham turli yengiltabiat ayollarni uyga boshlab keladigan odati bo‘lgan. So‘nggi vaqtlarda uyda yalang‘och yurish odatini chiqargan. Mast kunlari qizalog‘i bilan yalang‘och cho‘milishni xohlaydi — Dildora norozilik bildirsa, ikkisini kaltaklab, ko‘chaga haydaydi. Bu holatlar qizaloqning ruhiyatiga salbiy ta’sir qila boshlagan.

Dildoraning eri ichkilikka ruju qo‘yganidan mahalla-ko‘y ham xabardor — u mast holida qo‘shnilari bilan ham, mahalladagi o‘tkinchilar bilan ham ko‘p bora urishgan. Hatto bir oyda besh marta tuman IIBga olib ketilgan. Ayolning aytishicha, eri uni “urib, ko‘kartirib tashlagan”ida ham, u hech qachon 102 ga qo‘ng‘iroq qilmagan. “Ajrashish uchun turmush qurmaganman”, — deb aytgan Dildora, ko‘rsatuv davomida bir necha bor o‘zini tuta olmay yig‘lab yuborgan.

Ayol erini davolatish uchun uni yozda Narkologiya dispanseriga yotqizgan, o‘z vaqtida domlalarning oldiga ham olib borgan. U “oilamni saqlab qolishim kerak, insof berib qolar”, degan umid bilan yashab kelgan. Dildora istiqomat qiladigan mahalla qo‘mitasining raisi unga ota uyiga borib yashashni tavsiya qilgan. Ayolning onasi vafot etgan, otasining ikkinchi oilasi bor.

“Uchburchak” ko‘rsatuvi boshlovchisi Nilufar Umrzoqova Toshkent shahar Mirobod tumani hokimligi va ichki ishlar idoralarini ushbu vaziyatga e’tibor qaratishni so‘rab, shu kunlarda qizchasi bilan sarson-sargardon bo‘layotgan Dildora Baratovani ko‘chada qoldirmaslikni so‘ragan. Shuningdek, teleboshlovchi “bu mavzuga yana qaytish”ga va’da bergan.