26 декабрь куни Ўзбекистон мусулмонлари идорасида ҳаж ва умра сафарлари бўйича Саудия Арабистонидаги ҳамкор «ал-Ҳидоя» ширкати раҳбари Шайх Солиҳ Солим Баҳвайний билан учрашув бўлиб ўтди. Бу ҳақда диний идора матбуот хизмати хабар бермоқда.
Меҳмонни дин ишлари бўйича қўмита раиси Ортиқбек Юсупов ва Ўзбекистон мусулмонлари идораси раиси, муфтий Усмонхон Алимов кутиб олди.
Усмонхон Алимов учрашув аввалида «ал-Ҳидоя» ширкати билан кўп йиллардан буён ҳамкорлик қилиб келинаётгани, ҳаж ва умра сафарлари муваффақиятли ўтаётганини билдирди.
Шунингдек, келгуси ҳаж ва умра сафарларида зиёратчиларга хизмат кўрсатишни юқори даражага кўтариш, меҳмонхона, транспорт хизмати ва таомлар сифатини янада яхшилаш, Мино ва Муздалифа водийларида етарли жой ажратишга эришиш ҳамда ишчи, ошпазлар ва тиббиёт гуруҳларини барча зарур шарт-шароитлар билан таъминлаш каби масалаларни алоҳида қайд этди.
Хабарда қайд этилишича, ҳамкор «ал-Ҳидоя» ширкати раҳбари Шайх Солиҳ Солим Баҳвайний барча масала ва талабларни бажаришга имкони борлигини билдириб, ишончни тўла оқлаш учун бор куч-қувватини ишга солишини таъкидлаган.
У сўзининг якунида ўзаро ишончли ҳамкорлик учун миннатдорлик изҳор қилди.
Учрашув якунида томонлар «Умра–2018» мавсуми бўйича шартнома имзолади. Унга кўра, баҳор мавсумида 8500, рамазон мавсумида 1500 нафар ўзбекистонликлар умра зиёратини адо этиши белгиланган. «Умра – 2018» баҳор мавсуми 2018 йил 1 февралдан бошланиши режалаштирилган.
Изоҳ (0)