Халқаро пресс-клуб модераторларидан Жалолиддин Усмонов Ўзбекистон халқ таълими вазири ўринбосари Алишер Саъдуллаевнинг Facebook’даги муҳокамаларга сабаб бўлган постига жавоб қайтарди.
Алишер Саъдуллаев 25 декабрь куни Facebook’даги саҳифасида ўтказган кунидан қониқмагани, вақти бекор кетиб, бирор фойдали иш қилмаганини баён қилган эди. Саъдуллаев ўз постида етти соатдан кўпроқ Халқаро пресс-клуб сессиясида ўтирганини маълум қилган.
Мавзуга доир: Ўзбекистон ҳукуматидаги энг ёш вазир ўринбосари бир куни бекор кетганидан хафа бўлди. У етти соат ХПК сессиясида ўтирган
ХПК вакили жавоби
Вазир ўринбосарига жавоб қайтарган Жалолиддин Усмонов баъзи бир ўринларда Халқаро-пресс клуб номидан фикр билдириб, «бундай вазиятда ҳиссиётга берилиш, жамоатчилик ўртасида бошқаларни обрўсизлантириш ноўрин»лигини Алишер Саъдуллаевга эслатиб ўтган. «Агар Сиз халққа фикрингизни етказишни бекор кетган вақт деб билсангиз, хато қиласиз», — деб таъкидлаган Усмонов.
ХПК вакилининг алоҳида таъкидлашича, 25 декабрдаги анжуман пресс-клуб тарихидаги «энг катта тадбирлардан бири» бўлган — унга 170 киши таклиф қилинган ва тадбир қарийб 11 соат давом этган.
Жалолиддин Усмоновнинг қайд этишича, тадбирнинг чўзилиб кетишига сабаб — «жараён янги студияда тасвирга олингани ва тасвирга олиш жараёнида бир неча бор юз берган техник носозликлардир» ва «бундай ҳолат биринчи бор» кузатилиши. «Бу на пресс-клубга, на Медиамарказга ва на ‘Ўзбекистон 24’ телеканалига боғлиқ. Афсуски, XXI асрда инсон техникага қарам бўлиб қолди», — деб ёзади Усмонов.
Жалолиддин Усмонов нима учун Алишер Саъдуллаевга кеч навбат берилиши режалаштирилганини ҳам тушунтириб ўтган. «Сизга навбат кечроқ келиши Сиздан ёши улуғлар, элчилар, сенаторлар, имконияти чекланган инсонларга эртароқ навбат беришимиз билан боғлиқ», — деб ёзган ХПК модератори.
Жалолиддин Усмонов ўз жавобини шу сўзлар билан тугатган: «Айнан ХПК масъул лавозимдаги биринчи кунларингиздан бошлаб сиз билан бирга бўлганлигини унутмаслигингизни сўраган бўлардим».
Жавобга жавоб
Вазир ўринбосари Facebook’даги постни Халқаро пресс-клубни обрўсизлантириш учун эмас, балки бир кунини қандай ўтказгани ва ундан қониқмагани ҳақида билдириш учун чиқарганини таъкидлаган.«(ХПК раиси) Шерзод ака (Қудратхўжаев) доим ростини айтишга, ҳақиқатни олиб чиқишга ва ривожланишга ҳаракат қиладиган инсон. Мен ҳам шундай фикрлайман. Бу ҳолатда мен ҳис-ҳаяжонимни кўрсатиш учун эмас, балки истиқболда ХПК бундай ҳолатларга кўпроқ эътибор қаратишини истаган эдим», — деб ёзган Алишер Саъдуллаев.
Айни вақтда, Саъдуллаев кичик бир тушунмовчилик бўлгани — у ХПК сессиясига нега келганини ўзи ҳам яхши билмаганини маълум қилган.
Халқ олдига чиқиб, Президент Мурожаатномаси ҳақида ХПКда гапирар экансан, дейишганида, бу гаплар йўқ эди. Муаммо шундаки, биз шунчаки кузатиб ўтирдик ва бизнинг борлигимизни пайқашмади ҳам. Ёнимдаги тенгдошларим савол бера бошлади: «Биз ҳозир (соат 11:00 да) келдик, сиз қачон келдингиз?», — деб. Мен: «Соат 9:15 да», — дедим (ваҳоланки, уларда менинг зиммамдаги вазифалар йўқ, улар — талаба дўстларим).Халқ таълими вазири ўринбосари ўз жавобини қуйидаги сўзлар билан якунлаган: «ХПК бундан кейин ҳам мени қўллаб-қувватлашига ишонаман... Мен халқ олдида ҳисобот беришни бекорчилик деб ҳисобламайман, аммо ҳисоботга чақирилиб, ҳисобот бермасдан кетишни бекорчилик деб биламан».Соат 16:00 да: «Ака, (Ёшлар Иттифоқининг) тадбирига қачон борасиз, ахир бугун мукофотни топширишингиз керак», — дейишди. Мен уларга Президентимиз Мурожаатномаси барчасидан муҳим экани ва уни якунлаб, чиқишимизни айтдим.
Соат 16:20 бўлганда ХПКнинг бу сессияси менсиз ҳам якунланишини тушуниб етдим ва секин чиқиб кета қолдим. Шахсан мени шу сафар ХПКга фойдам тегмади. Шунчаки келиб-кетдим, холос.
Менга берилган вақтга хиёнат қилишга ҳаққим йўқ — бу давлат ҳақига, Президентимиз олға сураётган тизим, сиёсатга хиёнат бўлади.
Алишер Саъдуллаев, халқ таълими вазири ўринбосари
Жалолиддин Усмонов Алишер Саъдуллаевнинг бу фикрини ҳам жавобсиз қолдирмай, ХПКнинг 25 декабрдаги сессиясида қатнашган барча-барчага миннатдорчилик билдирган ҳамда, бу анжуман «кимнингдир кунлик режаларига таъсир ўтказган бўлса-да», ХПК бу воқеани «асрга татигулик кун» бўлишига ҳаракат қилганини айтиб ўтган.
«Сиз ҳам Президент командасининг ёш вакили сифатида ушбу сессияда қатнашганингиздан мамнун бўлганингизга ишонамиз!», — деб ўз жавобини якунлаган Жалолиддин Усмонов.
Изоҳ (0)