Ўзбекистон ахборот технологиялари ва коммуникацияларини ривожлантириш вазири вазифасини бажарувчи Шерзод Шерматов Facebook’даги саҳифасида халқ таълими вазири ўринбосари — 23 ёшли Алишер Саъдуллаевни қўллаб-қувватлаб пост қолдирди.
Алишер Саъдуллаев 25 декабрда бутун бир куни бекорга ўтиб кетгани ҳақида Facebook’даги саҳифасида пост қолдирган эди. У, прокуратура чақируви билан, тонг соат 9:15 да Халқаро пресс-клуб сессияси (ХПК)га келгани, унда бирор чиқиш қилмай, шунчаки томошабин бўлиб ўтириб, етти соатдан сўнг — 16:20 да анжуманни тарк этганини ёзган.
ХПК модератори Жалолиддин Усмоновнинг маълум қилишича, анжуман 11 соат давом этган. Усмонов вазир ўринбосарига «ҳиссиётга берилиб, бошқаларни обрўсизлантириш ноўрин»лигини эслатиб ўтган. Шунингдек, у Саъдуллаевдан ХПК унинг масъул лавозимдаги илк кунлариданоқ бирга бўлганини унутмасликни сўраган.
АКТ вазирлиги раҳбари Шерзод Шерматов эса давлат ишига қийинчилик билан жалб этилаётган ёшларнинг вақтини «бундай самарасиз ўтишига йўл қўйиш — нотўғри»лигини таъкидлади. Айни дамда, у Алишер Саъдуллаевни айбдор қилишга уринувчилардан ҳимоя қилиш лозимлигини уқтирган.
Алишернинг фикрини ўқиб: Президентимиз янгича ишлашга даъват этганларидан кейин шундай аҳвол бўлиши, албатта, ноўриндир. Ёшларни давлат ишига жалб қиламиз, деб шунча ҳаракат қилинса-да, уларнинг вақтини бундай самарасиз ўтишига йўл қўйиш — нотўғри.(Алишер) шу фикрини қўрқмай айтганининг ўзи ҳам Президентимизнинг ёш кадрларни (лавозимларга) қўйиш бўйича қилаётган ҳаракатлари тўғрилигини кўрсатиб турибди. Аввалгидек фақат «Хўп бўлади, хўжайин» дейдиган раҳбарлар билан фаол тадбиркорлик, инновацион ғоялар ва технологияларни ривожлантириб бўлмайди!
Энди, энг асосийси, бу фикридан кейин Алишерни айбдор қилиб, уни эскича қолипга солишга ҳаракат қилувчилардан асраш керак.
Давлат ишига креатив, юқори малакали кадрларни жалб қилиш жуда қийин. Чунки маош юқори эмас, режим оғир ва масъулият катта. Лекин буларга чидаса бўлади — агар кадр келгусида ўз ҳаракати билан жамиятга фойдаси тегишини сезса ва ўз ғояларини ҳаётга жорий қила олишига кўзи йэтса.
Бунинг акси бўлса ва вақти бекор кетаётганини кўрса, боз устига ўзи хоҳламаган ва, айниқса, нотўғри деб билган ишларни бажаришга турли идоралар орқали мажбур қилишса, юқори малакали давлат хизматчилари синфини шакллантиришимиз жуда қийин бўлади. Бундай давлат хизматчиларисиз эса Президентимиз томонидан белгиланган вазифаларни сифатли амалга ошириш жуда мушкул.
Шерзод Шерматов, Ўзбекистон ахборот технологиялари ва коммуникацияларини ривожлантириш вазири вазифасини бажарувчи
Изоҳ (0)