Россиянинг Хакасия Республикасидаги Боград туман суди Любов Лицегевичнинг асраб олинган болаларини қайтариш ҳақида қарор қабул қилди. Бу ҳақда TJournal хабар берди.
20 декабрь куни Лицегевичнинг беш ёшли ўғлининг сочи жуда узун бўлганлиги сабабли унинг болалари олиб қўйилгани ҳақида хабар берилган. Можаро 2017 йилнинг 22 майида, боғча тарбиячиси боланинг сочи узунлигидан шикоят қилганда бошланган. Судда гувоҳлар боланинг сочи июнь ойида қисқартирилганини тасдиқлаган.
Натижада беш ёшли болага нисбатан васийликнинг бекор қилиниши ҳақида қарор қабул қилинган. 3 ноябрда эса аёлнинг барча болалари васийлик идораси томонидан олиб қўйилган.
Воқеалар ҳақида ОАВлардаги хабарлардан сўнг сенатор Елена Мизулина Бош прокуратурадан васийлик органи ҳаракатининг қонунийлигини текширишни сўраган. Шунингдек, у боланинг сочи узунлиги ҳақидаги аргументни танқид қилган.
Любов Лицегевич 57 ёшда бўлиб, 21 нафар болани тарбия қилган. Улардан 20 нафари асраб олинган. Аёл болалар тарбияси учун кўп сонли орденлар ва миннатдорчиликлар билан тақдирланган.
Изоҳ (0)